Փարիզի Ժողովրդավարության եւ համագործակցության ինստիտուտում տեղի է ունեցել նախկին դիվանագետ, Կովկասում ԵԱՀԿ նախկին հատուկ ներկայացուցիչ Մորիս Բոննոյի «Դե ֆակտո պետություններ» գրքի շնորհանդեսը:
ԼՂՀ ԱԳՆ մամուլի ծառայությունից հայտնում են, թե միջոցառմանը ելույթով հանդես են եկել նաեւ Լեռնային Ղարաբաղի Հանրապետության, Պաղեստինի եւ Սոմալիլենդի` Ֆրանսիայում գործող ներկայացուցչությունների ղեկավարները, ինչպես նաեւ Մերձդնեստրի Գերագույն խորհրդի պատգամավորներից մեկը:
Իր ելույթում Ֆրանսիայում Լեռնային Ղարաբաղի Հանրապետության Մշտական ներկայացուցիչ Հովհաննես Գեւորգյանը ներկայացրել է Արցախի անցած ուղին եւ երկրում տեղի ունեցող պետականաշինության գործընթացը:
Նա ընդգծել է, որ Լեռնային Ղարաբաղի Հանրապետության միջազգային ճանաչումը ոչ միայն դրական ազդեցություն կունենա երկրի առջեւ ծառացած հիմնախնդիրների լուծման գործում, այլ նաեւ կնպաստի տարածաշրջանում խաղաղության եւ կայունության հաստատմանը:
