ԱԻՄ առաջնորդ Պարույր Հայրիկյանը կարծում է, որ Հայաստանի` ԵՏՄ-ին անդամակցության դեմ Ազգային ժողովի մոտ բողոքում էին սակավաթիվ մարդիկ, որովհետեւ բոլորը համոզված են, որ «պուտինիզմը շուտով վերանալու է»:
«Ասել, որ սակավաթվությունը կախված է նրանից, որ մարդիկ գոհ են ԵՏՄ մտնելուց, այդպես չէ: Այստեղ գործում է հայ քաղաքացու այն մոտեցումը, որ ամբողջ աշխարհի դեմ ելած պուտինիզմը շուտով տապալվելու է եւ չարժի դրա դեմ պայքարել»,- այս մասին այսօր` դեկտեմբերի 10-ին, լրագրողների հետ զրույցում ասաց Պարույր Հայրիկյանը:
Ինչ վերաբերվում է անդամակցությանը կողմ քվեարկածներին, ապա ԱԻՄ առաջնորդի խոսքով` այդ մարդիկ այլեւս պետք է չտան Աշոտ Նավասարդյանի անունը. «Իրենք իրենց քվեարկությամբ իրենց վրա խարան դրեցին, չգիտեմ, թե մի քանի ամիս հետ ինչպես պետք է արդարանան»:
Նշենք, որ դեկտեմբերի 1-ից չորս օր մի խումբ քաղաքացիներ բողոքի ակցիաներ էին անցկացնում խորհրդարանի մոտ` պահանջելով չվավերացնել ԵՏՄ-ին միանալու պայմանագիրը: Այնուամենայնիվ, դեկտեմբերի 4-ին Ազգային ժողովը 103 կողմ ձայներով վավերացրեց անդամակցության պայմանագիրը: Դեմ քվեարկեցին 7 պատգամավոր, իսկ մեկն էլ ձեռնպահ քվեարկեց:
