Հովվապետական այցով Աբու Դաբիում գտնվող Մեծի Տանն Կիլիկիո Կաթողիկոս Արամ Ա-ի գլխավորած պատվիրակությունն այցելել է Արաբական Միացյալ Էմիրություններում ՀՀ դեսպանություն:
ԱԳՆ մամուլի ծառայությունից հայտնում են, որ ավանդական աղուհացի օրհնությունից հետո դեսպանատան պարտեզում տեղի ունեցավ ծառատունկ: Իր խոսքում ԱՄԷ-ում ՀՀ դեսպան Գեղամ Ղարիբջանյանը բարի գալուստ մաղթեց Նորին Սրբությանը: Դեսպանն անդրադարձավ Արամ Ա. կաթողիկոսի ազգանվեր գործունեությանն ու նշեց, որ անձամբ է ճանաչում վեհափառին 25 տարուց ի վեր, ինչպես նաեւ քաջածանոթ է նրա ազգանվեր գործունեությանն ու ձեռնարկներին:
Իր հերթին Արամ Ա կաթողիկոսը նշեց, որ Հայաստանը յուրաքանչյուր հայի հայրենիքն է եւ սրբազան վայր` իր հողով ու մշակույթով, իր արժեքներով եւ ձգտումներով: Ըստ Վեհափառի` Մեծի Տանն Կիլիկիո Կաթողիկոսությունն իր թեմերով այս գիտակցությամբ ու հանձնառությամբ է շարունակում գործել: Արամ Ա կաթողիկոսն իր գոհունակությունը հայտնեց ԱՄԷ-ի եւ Քաթարի հայերին` դեսպանության ծրագրեին աջակից լինելու համար: Բարձր գնահատելով դեսպանի եւ դեսպանության անձնակազմի աշխատանքը` Վեհափառն օրհնեց դեսպանությունը` իր բարեմաղթանքները հայտնելով դեսպանության ծրագրերի իրագործմանը:
Դեկտեմբերի 12-ին հանդիսավոր պայմաններում կաթողիկոսն օծեց Աբու Դաբիի Սրբոց Նահատակաց եկեղեցին:
Օծման արարողությանը ներկա էին ԱՄԷ-ում բոլոր քրիստոնյա համայնքների ներկայացուցիչները, դիվանագետներ, լրագրողներ, հայ համայնքի բազմաթիվ ներկայացուցիչներ: Նույն օրը` երեկոյան, Աբու Դաբիի «Սենթ Ռեջիս» հյուրանոցում տեղի ունեցավ ընդունելություն` Սրբոց Նահատակաց եկեղեցու օծման կապակցությամբ:
