Որքան քիչ թուրքական ապրանքներ լինեն Հայաստանում, այնքան լավ: Այս մասին NEWS.am-ի թղթակցի հետ զրույցում նշել է Հայաստանի կոշիկ արտադրողների միության նախագահ Կարապետ Մովսիսյանը՝ պատասխանելով հարցին, թե ինչ է ակնկալում Հայաստանի՝ ԵՏՄ անդամակցությունից եւ Թուրքիայից ներկրվող ապրանքների նկատմամբ մաքսային վերահսկողության հնարավոր խստացումից:
«Իհարկե, շատ լավ կլինի: Եւ ընդհանրապես, որքան քիչ թուրքական ապրանքներ հասնեն Հայաստան, այնքան լավ: Մենք հերքո՞ւմ ենք փաստը, որ թուրքերը մեր թշնամիներն են: Չենք հերքում, բայց ջուր ենք լցնում նրանց ջրաղացին՝ գնելով նրանց ապրանքները: Ահա եւ ձեզ իմ պատասխանը»,-ընդգծել է Մովսիսյանը:
Նշենք, որ թուրքական ապրանքների մի մասը (այդ թվում հագուստի, կոշիկի եւ ջերմոցային մթերքների) Հայաստան է ներմուծվում առանց մաքսատուրքերի: Թուրքիայի հետ առեւտուրը (գրեթե ամբողջությամբ ներկրում) 2013-ին կազմել է Հայաստանի արտաքին առեւտրաշրջանառության 3,6 տոկոսը կամ մոտ 212,5 մլն դոլար (2012-ին այն կազմել է 3,8 տոկոս):
