Ազգային ժողովի ՀՀԿ խմբակցության պատգամավոր Մանվել Բադեյանը պնդում է, որ զարմանալի չէ Հայաստանի` Եվրասիական տնտեսական միությանն անդամակցելը, քանի որ գործող իշխանություններն այդ մասին միշտ են ասել:
Այսօր` դեկտեմբերի 16-ին, լրագրողների հետ զրույցում Մանվել Բադեյանն ընդգծեց, որ ԵՏՄ-ով մենք լուծում ենք նաեւ անվտանգության խնդիրը` երաշխիքներ ստանալով դաշնակից Ռուսաստանից:
ՀՀ ԱԺ արտաքին հարաբերությունների հանձնաժողովի նախկին նախագահ, փորձագետ Հովհաննես Իգիթյանը, սակայն, հիշեցրեց ՀՀԿ-ական պատգամավորին, որ ընդամենը երկու տարի առաջ իշխանության ներկայացուցիչները պնդում էին, որ Հայաստանը գնում է դեպի Եվրոպական ասոցացման համաձայնագիր:
«Ինչ վերաբերվում է անվտանգության երաշխիքներին, ապա Սերժ Սարգսյանը սեպտեմբերի երեքին հայտարարեց, որ մեզ ասել են` եթե չմտնեք ԵՏՄ, ապա կլինեք Ուկրաինայի դերում: ՀԱՊԿ-ի մասին էլ ասեմ. ո՞ւր են նրանք, երբ դիվերսանտները մտնում են մեր երկիր, երբ ուղղաթիռ են խոցում, ո՞ւր են նրանք»:
Մանվել Բադեյանը, այնուամենայնիվ, շարունակեց պնդել, որ ԵՏՄ-ին միանալով` մենք անվտանգության հարցն ենք լուծում:
Նշենք, որ հունվարի մեկից Հայաստանը դառնալու է ԵՏՄ անդամ: