Եվրամիությունը շատ շուտով Հայաստանում վերջին միջադեպերի հետ կապված հայտարարությամբ հանդես կգա: Այս մասին դեկտեմբերի 16-ի մամուլի ասուլիսում հայտարարել է Հայաստանում Եվրամիության պատվիրակության ղեկավար, դեսպան Տրայան Հրիսթեան՝ անդրադառնալով ընդդիմադիր գործիչների վրա հարձակումների դեպքերին:
Ըստ նրա՝ Եվրամիությունը տեղյակ է այդ միջադեպերի մասին: «Ներկայումս ես կցանկանայի խուսափել այդ հարցի վերաբերյալ դիրքորոշում արտահայտելուց: Շատ շուտով մենք մեր ԵՄ գործընկերների հետ հայտարարություն կտարածենք այդ միջադեպերի հետ կապված: Եվ ես կխնդրեի հետեւել դրան», - ասել է Տրայան Հրիսթեան:
Հիշեցնենք, դեկտեմբերի 11-ի երեկոյան իր տան մոտ հարձակման էր ենթարկվել ՀԱԿ խմբակցության քարտուղար Արամ Մանուկյանը: Դրանից մի քանի օր առաջ ծեծի էին ենթարկվել Արցախյան պատերազմի մասնակիցներ Ռազմիկ Պետրոսյանը, Մանվել Եղիազարյանը եւ Սուրեն Սարգսյանը:
