Ազգային ժողովի նախկին պատգամավոր, «Մաքս կոնցեռն» ընկերության ղեկավար Խաչիկ Մանուկյանը դրական է տրամադրված եւ վստահ է, որ շուտով դոլարի կուրսը կիջնի, փոխարժեքը կկայունանա: Այս մասին NEWS.am-ի թղթակցի հետ զրույցում ասաց Խաչիկ Մանուկյանը:
Պարոն Մանուկյան, ձեր բիզնեսը տուժե՞լ է դրամի արժեզրկումից, փոխարժեքի այս վայրիվերումներից:
Ես չեմ տուժել, պետությունն է տուժում, մենք գործարար մարդիկ ենք, մենք ո˚նց կարող ենք տուժել:
Բայց շատ գործարարներ «լացում են», ասում են՝ պայմանագրեր, վարկեր ունեն:
Պայմանագրերը դոլարով անեն:
Իսկ ինչո՞ւմ է գաղտնիքը, որ դուք վնասներ չեք կրել:
Բոլորն էլ վնասներ կրել են, ընդամենը գների թանկացում է լինելու, գներն էլ թանկանում են, դրա համար ասում եմ՝ ոչ մեկն էլ չի տուժելու, տուժելու է միայն ժողովուրդը:
Ի՞նչ պետք է անի Կառավարությունը, վարչապետ Հովիկ Աբրահամյանը ճգնաժամից դուրս գալու համար:
Պետք է գնան դոլար բերեն: Եթե դոլարի պահանջարկ կա, պիտի գնան բերեն: Հիմա եթե այսօր ձու չլինի, 500 դրամով ձու կծախենք, եթե առնող լինի, կծախենք, պիտի գնանք ձու ներկրենք կամ արտադրենք, որ գները իջնի, նույնն էլ դոլարն է:
Հաշվե՞լ եք փոխարժեքի հետ կապված ձեր բիզնեսի ինչքանի վնաս է կրել:
Չեմ հաշվել, օրական բան է փոխվում, չեմ կարող հաշվել, կայունանա, կհաշվեմ, բայց վնասներ կրել եմ: Օրվա թելադրանքով շարժվում եմ, շատ արագ է փոխվում ամեն ինչ, միանշանակ է, որ սա վատ է ազդելու գործարար աշխարհի վրա, տեսնենք՝ ինչքան կտուժենք:
Ռուսաստանի հետ բիզնես կապեր ունե˚ք, ռուբլու արժեզրկումը ազդե՞լ է ձեր վրա:
Ուզում էի անել, բայց հիմա մտածում եմ՝ ինչ անել, որ ճիշտ լինի:
Ինգա Մարտինյան