Մաքսային կարգավորման նախագծում մի շարք հոդվածներ պետք է վերանայվեն: Այս մասին այսօր՝ դեկտեմբերի 17-ին, Ազգային ժողովում հայտարարեց ՀՅԴ խմբակցության պատգամավոր Արծվիկ Մինասյանը:
Նա նշեց, որ ԵՏՄ անդամակցությունը պետք է նպաստի Հայաստանում տնտետսության մրցունակության բարձրացմանը, բայց եթե թողնում ենք կարգավորումների նույն ռեժիմը, ստացվում է, որ այդ առավելությունից զրկվելու ենք: Պատգամավորը ահազանգում է, որ դեռեւս նույնիսկ պայմանագիրը ուժի մեջ չմտած, օդանավակայաններում շարունակվում է անձնական իրերի զննությունը, ցանկացած ապրանք, որը գնվել է դրսում, սկսում են հետաքրքրվել, թեկուզ եթե այդ ապրանքը մեկ հատ է: Սա, ըստ Արծվիկ Մինասյանի, նշանակում է, որ անհարկի խոչընդոտներ են ստեղծվելու մաքսակետերում, եւ ԵՏՄ անդամակցության հարցը այս մակարդակում կդիտիվ ոչ թե առավելություն, այլ խոչընդոտ:
Մյուս հարցը, որին անդրադարձավ ՀՅԴ-ական պատգամավորը, վերաբերում է միջազգային փոստային փոխադրումների շրջանակում լայն տարածում ունեցող էլեկտրոնային առեւտրին, որը հնարավորություն է տալիս երկրի ներսում մրցունակություն ապահովելուն: Արծվիկ Մինասյանը նշեց, որ լավ առիթ է իրականացնելու Կառավարության ծրագիրը եւ սահմանին հանելու ավելացված արժեքի հարկը, այլապես խոչընդոտում ենք ապրանքների ազատ տեղաշարժը:
«Սա մրցակցության տեսակետից լավագույն գործիքը կարող էր լինել ապրանքների, ծառայությունների նորմալ գների ձեւավորման հարցով: Պետք է քաղաքացիները զգան, որ ԵՏՄ անդամակցությունը մեզ առավելություն է տալիս, ոչ թե լրացուցիչ գործիք է տնտեսության ստվերը մեծացնելու, մենաշնորհային տնտեսությունը խրախուսելու: Բոլորս էլ հասկանում ենք, որ ԵՏՄ կայացումը մեզնից չէ կախված, բայց եթե կա ընձեռված հնարավորություն, դա իրացնենք մեր երկրի համար»,-հայտնել է ՀՅԴ-ական պատգամավորը: