Բարձրացնելով արտարժույթի փոխարժեքը, փոխանակման կետերը փորձում են պաշտպանվել: Այս մասին, այսօր՝ դեկտեմբերի 17-ին, լրագրողների հետ հանդիպման ժամանակ հայտարարել է Հայաստանի ԿԲ նախագահ Արթուր Ջավադյանը:
Նրա խոսքով՝ փոխանակման կետերի աշխատակիցները դա անում են, որպեսզի կանխեն արտարժույթի վերավաճառքը:
«Նրանք փորձում են դրանով արգելափակել վաճառքը, իսկ մարդկանց թվում է, որ դա է իրական փոխարժեքը»,-նշել է Ջավադյանը՝ հավելելով, որ դա նոր աժիոտաժի պատճառ է դառնում:
Բացասական սպասումները ազդում են նաեւ գնումների վրա. մարդիկ փորձում են ավելին գնել, քան պետք է: «Գնում են եւ շաքար, եւ կենցաղային տեխնիկա, եւ ոսկեղեն, եւ մեքենաներ: Պարզ է, որ ինչ-որ մեկը ցանկանում է աշխատել նաեւ այդտեղ»,-հավելել է Ջավադյանն ու շարունակել. «Այդուհանդերձ, պատժվելու են եւ սպեկուլյանտները, եւ նրանք, որոնք սպեկուլյատիվ սպասումներ են ձեւավորում»:
