Եգիպտոսի հայկական համայնքի շատ ներկայացուցիչներ Ամանորը դիմավորում են հենց Կահիրեի Սուրբ Գրիգոր Լուսավորիչ եկեղեցում: NEWS.am-ի թղթակցի հետ զրույցում Հայկական բարեգործական ընդհանուր միության Եգիպտոսի շրջանային հանձնաժողովի պատվո ատենապետ Պերճ Թերզյանը հայտնեց, որ Եգիպտոսում ապրող հայերը Նոր տարին նշում են սովորականի պես, հատուկ սովորույթներ չունեն:
«Երկու ձեւով ենք նշում Ամանորը՝ ակումբային եւ ընտանեկան: Ակումբում հավաքվում են հայերը, մեծ միջոցառում է լինում, որի ժամանակ հնչում է ամեն տեսակ երգ ու երաժշտություն: Կան մարդիկ, որոնք նախընտրում են տանը նշել, իհարկե՝ պահպանելով բոլոր ավանդույթները, պատրաստում են մեր հայկական ավանդական ուտելիքները: Կան նաեւ հայեր, որոնք Նոր տարվա գիշերը դիմավորում են հենց եկեղեցում»,- ասաց Պերճ Թերզյանը:
Նրա խոսքով՝ Եգիպտոսում այսօր բնակվում է 4-5 հազար հայ, հիմնականում Ցեղասպանությունից հետո գաղթածները:
«Կան նաեւ մի քանի տարի առաջ Հայաստանից եւ Սիրիայից եկած հայեր, բայց նրանք շատ սակավաթիվ են»,- ավելացրեց Պերճ Թերզյանը: