Ռուսաստանից ստացված տնտեսական լուրերն արդեն ռազմաճակատից ստացված հաշվետվություններ են հիշեցնում: Ռուբլու անկման, գնաճի եւ այլ խնդիրներին ավելացել է նաեւ ցորենի հետ կապված հարցը: Այն բառացիորեն օրեցօր է թանկանում: Ռուսական փորձագետները կարծիքով, դա կապված է ինչպես ռուսական ռուբլու թուլացման, այնպես էլ համաշխարհային շուկայի կոնյուկտուրայով:
Ցորենն ավանդաբար մեր ներմուծման կարեւորագույն տարրերից է: Այսպես, անցյալ տարվա տվյալներով, այն ներմուծվող ապրանքների խոշորագույն ծավալների ցանկում զբաղեցրել է 7-րդ տեղը՝ գրեթե 109 մլն դոլար ցուցանիշով: Ընդ որում, ցորենի մասնաբաժինն ընդհանուր ծավալներում կազմել է 2.4%: Դա փոքր ցուցանիշ չէ, եթե հաշվի առնենք, որ Հայաստան շուրջ 1300 տեսակի ապրանք է ներմուծվում:
Մեր երկիր հիմնականում ռուսական ցորեն է ներկրվում: Անցյալ տարվա տվյալներով, ներկրման ընդհանուր ծավալներում Ռուսաստանի մասնաբաժինը կազմել է գրեթե 94%: Այդ ռեսուրսները հայրենական արտադրողներն օգտագործում են հիմնականում հացի, ինչպես նաեւ մի շարք այլ հացամթերքի արտադրության մեջ: Հասկանալի է, որ ռուսական հումքի թանկացումը կարող է լուրջ հետեւանքներ ունենալ նաեւ մեր երկրի համար: Մասնավորապես, եւ հատկապես, եկամուտների ցածր մակարդակ ունեցող ընտանիքների համար:
Հետաքրքիր է, որ վերջին երկու տարիներին հացի մանրածախ գինը բացարձակ չարձագանքեց ցորենի մաքսային գնի տատանումներին: Դա տեսանելի է ներքոնշյալ գրաֆիկում, որտեղ բերված է ցորենի մաքսային գնի եւ հանրապետության մայրաքաղաքում հացի մանրածախ գնի դինամիկան (դրամական հաշվարկով):
Այդ ժամանակահատվածում մաքսային գինը հստակ արտահայտված նվազման միտում ունի: Այսինքն՝ ընդհանուր առմամբ, ցորենը եռամսյակով էժանացել է: Նշենք, որ անցյալ տարվա երկրորդ եռամսյակին, երբ գինն առավելագույնն է եղել, բաժին է հասել ներմուծվող ցորենի տարեկան ծավալի ընդամենը 5%-ը, իսկ ահա երրորդ եւ չորրորդ եռամսյակներին, երբ գները ցածր էին, 83%-ը:
Սակայն արտադրողները, որպես կանոն, արձագանքում են միայն մաքսային գների բարձրացմանը, այլ ոչ թե նվազմանը: Շատ քաղաքացիների մեկ կարեւոր հարց է հետաքրքրում. ինչպիսի՞ն է հացի ապրանքային արտադրության շահութաբերությունը, եւ արդյո՞ք հացի գործարանները գերշահույթ են ունենում:
Հացի ինքնարժեքի կառուցվածքի (ինչպես նաեւ այլ ապրանքների) մասին տեղեկությունը խիստ գաղտնի է: Կոմերցիոն գաղտնիքի մասին օրենքն արտադրողներին հնարավորություն է տալիս ցանկացած ցուցանիշ «խիստ գաղտնի» հայտարարել: Այստեղից էլ եզրակացություն. գործարարները բավականին պատճառներ ունեն հասարակությունից այդ տեղեկությունը թաքցնելու համար: Այնպես որ՝ չի բացառվում, որ հացի «կայուն» գնի ֆենոմենը դրա ֆիզիկական քաշի հետեւողական կրճատման, ինչպես նաեւ կասկածելի հավելումների ավելացման մեջ է:
