Ավտոգազալցակայաններում (ԱԳԼՃԿ) դեկտեմբերի 17-ի երեկոյան գազի գինը հասել է 270 դրամի: Այս մասին NEWS.am-ի թղթակցին հայտարարեցին Երեւանի երկաթուղային կայարանի հարեւանությամբ գործող տաքսու պարկից մի քանի վարորդներ:
«Գինն անընդհատ տատանվում է. մե՛կ աճում է, մե՛կ ընկնում: Երեկ օրվա ընթացքում 230 էր, հետո հասավ մինչեւ 270-ի»,- հայտարարեց նրանցից մեկը: Մեկ այլ վարորդի խոսքով էլ, մայրաքաղաքից դուրս սակագինը նույնն է՝ 170-180 դրամ, ինչպես դրամի փոխարժեքի անկումից առաջ:
«Նույնիսկ Երեւանին մոտ հատվածներում՝ Մասիս, Աշտարակ, միեւնույն է, էժան է: Իսկ մի քանի կիլոմետր այս կողմ՝ Երեւանում, արդեն թանկ է: Քաղաքի ծայրամասերում 1-2 էժան լցակայաններ կան, բայց այնտեղ ստիպված ես 30-40 րոպե սպասել: Բոլորն արդեն գիտեն ու այնտեղ են գնում, որպեսզի գոնե 30-40 դրամ խնայեն: Ասենք՝ 1.3 ծավալով բալոնի դեպքում նվազագույնը 500-600 դրամ խնայողություն է ստացվում: Քիչ չէ»,- հավելեց մյուս վարորդը:
Դեկտեմբերի 18-ի կեսօրից հետո Հայաստանի վարչապետ Հովիկ Աբրահամյանը լրագրողներին վստահեցրել էր, որ իրավիճակը կայունացել է, եւ գազը մայրաքաղաքում 200 դրամ արժե:
