Գազի գնի դեմ բողոքող՝ միջքաղաքային երթուղայինների վարորդները մինչեւ հունվարի 15-ը բողոքի ակցիաներ չեն անի: Այս մասին այսօր՝ դեկտեմբերի 19-ին, NEWS.am-ին ասաց վարորդներից Յուրա Համբարձումյանը, որը մասնակցել էր նախորդ օրը քաղաքապետարանում հրավիրված աշխատանքային հանդիպմանը:
«Մեզ ասեցին, որ գազի գինը իջել, հասել է 200 դրամի, դոլարի կուրսը նույնպես իջել է: Ասացին մինչեւ հունվարի 15-ը սպասենք, այդ օրը նորից ժողով պետք է լինի, պարզ կլինի մի բան: Կամ նորից կէժանանա գազը, կամ տրանսպորտը կթանկանա, կամ չգիտեմ ինչ կանեն»,-ասաց Յուրա Համբարձումյանը՝ նշելով, որ եթե խնդիրը դրական լուծում չստանա, իրենք նորից կկանգնեցնեն մեքենաները եւ չեն աշխատի:
Յուրա Համբարձումյանը միեւնույն ժամանակ նշեց, որ թե ինքը, թե մյուս վարորդները դեմ են ուղեվարձի թանկացմանը, այդ դեպքում նույնպես պատրաստ են բողոքի դուրս գալ:
«Ուղեվարձի թանկացումը ոչ մեկին ձեռք չի տալիս: Մենք էլ ընտանիքներ ունենք, մեր ընտանիքներն էլ են տրանսպորտից օգտվում: Մեզ ուզում ենք, որ գազի գինը իջնի»,-ասաց նա:
Հիշեցնենք, որ նախորդ օրը Երեւանի քաղաքապետարանում աշխատանքային հանդիպում էր հրավիրվել՝ գազի գնի բարձրացման հետ կապված երթուղայինների վարորդների բողոքը քննարկելու համար։ Հանդիպումն անցկացվել էր քաղաքապետի տեղակալ Վահե Նիկոյանի, տրանսպորտի վարչության աշխատակիցների, երթուղիները սպասարկող ընկերությունների ղեկավարների եւ վարորդների միջեւ: