Լոռու մարզի ընդհանուր իրավասության դատարանում շարունակվում է Վանաձորում 2013թ.-ի հոկտեմբերի 12-ին դանակահարության պատճառով մահացած 15-ամյա Դավիթ Հովակիմյանի գործով դատավարությունը:
NEWS.am-ի թղթակցի հետ զրույցում գործով ամբաստանյալ Կարեն Կունգուրցեւի պաշտպան Արայիկ Պապիկյանը հայտնեց, որ արդեն հարցաքննվել են գործով հիմնական 4 վկաներից 3-ը:
«Երեքն էլ հայտարարում են, որ դեպքի վայրում չեն եղել, ոչինչ չեն տեսել, մինչդեռ նախաքննության ժամանակ ճիշտ հակառակն էին ասել: Դատարանում ասացին, որ քննիչին պատմել են այն, ինչ իրենց ընկերն է պատմել: Սա նշանակում է, որ Կունգուրցեւի հայտարարությունը, թե ինքը մեղավոր չէ, համապատասխանում է իրականությանը»,- ասաց փաստաբանը:
Նրա խոսքով՝ դեկտեմբերի 27-ին էլ կհարցաքննվի գործով 4-րդ վկան, որից հետո շատ հարցերի պատասխաններ կտրվեն: Նշենք, որ գործով վկաները մահացած Դավիթ Հովակիմյանի թիմակիցներն են, անչափահասներ:
Հիշեցնենք, որ ըստ մեղադրական եզրակացության՝ Կարեն Կունգուրցեւը հոկտեմբերի 12-ին ժամը 18:00-ի սահմաններում կենցաղային հողի վրա վիճաբանել է եւ ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանի կրծքավանդակի ձախ կեսի շրջանում`վերջինիս պատճառել մարմնական վնասվածքներ, սակայն վերջինիս ընկերների կողմից օգնության հասնելուց հետո Կարենը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է: Կարենին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով: Խափանման միջոց է ընտրվել կալանավորումը: Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: