«Air Armenia» ավիաընկերությունն արդեն տոմսերի դիմաց փոխհատուցել է մոտ 2800 ուղեւորի: Այս մասին դեկտեմբերի 19-ին Երեւանում լրագրողներին հայտնել է ավիաընկերության գլխավոր տնօրեն Արսեն Ավետիսյանը: Ըստ նրա՝ մնում են եւս 375 ուղեւորներ:
Ավետիսյանը նշել է, որ վերջին շաբաթներին փոխարժեքի տատանումները ընկերության վրա էլ են ազդել:
Ռուսական ռուբլով վճարումները դոլարով փոխանակվում էին նվազ շահավետ փոխարժեքով: «Ցավոք, կորուստներ ունեցան նաեւ մեր ուղեւորները, բայց այդ հանգամանքները, ինչպես հասկանում եք, մեզանից կախված չէին», - հավելել է Ավետիսյանը:
Նա նշել է, որ այն բանից հետո, երբ սեպտեմբերի կեսերին «Ռոսաերոնավիգացիա» դաշնային գործակալությունը հայտարարեց, որ դադարում է սպասարկել ընկերության՝ դեպի Ռուսաստան կատարված չվերթները, տոմսերի վաճառքը կրճատվեց: «Հիմա էլ մենք ամենապայծառ ֆինանսական վիճակում չենք, բայց նոր ներդրողի հայտնվելով հուսով ենք շտկել իրավիճակը: Մեզնից ոչ մեկը չի պատրաստվում սկսած գործը կիսատ թողնել», - վստահեցրել է Ավետիսյանը:
Նշենք, այսօր ավիաընկերությունը հայտարարել է նոր ներդրողի մասին. ուկրաինական «East Prospect Fund» ներդրումային հիմնադրամը 30 մլն դոլար կներդնի ավիաընկերության 49% բաժնեմասում: