Եվրախորհրդարանը կարեւորում է ԵՄ - Հայաստան համագործակցության ամրապնդումը եւ շարունակելու է աջակցությունը այդ ուղղությամբ գործադրվող ջանքերին։ Այս մասին, այսօր՝ դեկտեմբերի 19-ին, Հայաստանի ԱԳ նախարար Էդվարդ Նալբանդյանի հետ հանդիպման ժամանակ նշել է Եվրոպական խորհրդարանի փոխնախագահ Ռիչարդ Չառնեցկին:
ԱԳՆ մամուլի ծառայությունից հայտնում են, որ ողջունելով հյուրին` նախարար Նալբանդյանը կարեւորեց Եվրոպական միության հետ համակողմանի փոխգործակցության զարգացումը՝ 2013թ. Վիլնյուսի գագաթաժողովի շրջանակներում ընդունված Հայաստան - ԵՄ համատեղ հայտարարությանը համապատասխան։
Կողմերն անդրադարձել են Հայաստան - Եվրոպական միություն փոխգործակցության հարցերին, Արեւելյան գործընկերության, Եվրանեսթի շրջանակներում իրականացվող աշխատանքներին։ Այս համատեքստում զրուցակիցները կարեւորել են ԵՄ աջակցությունը` Հայաստանում իրականացվող բարեփոխումներին: Հայաստանի արտգործնախարարն ու Եվրախորհրդարանի փոխնախագահը մտքեր են փոխանակել միջազգային ու տարածաշրջանային մի շարք հրատապ խնդիրների շուրջ:
