Կոտայքի մարզի Զովունի գյուղի մոտ գտնվող ավտոգազալցակայանում ըստ վահանակի՝ գազն արժի 175 դրամ, իսկ իրականում այն վաճառվում է 230 դրամով: Այս մասին ասաց NEWS.am-ի խմբագրություն դիմած Արթուրը:

«Գնացել էի գազ լցնելու, պարզվեց, որ գազն այստեղ էլ է թանկացել: Մինչեւ թանկանալը՝ ես մեքենաս լիցքավորում էի 3800, ամենաշատը 4000 դրամով, իսկ այսօր վճարել եմ 5 հազար դրամ: Բայց վահանակի վրա նույն 175 դրամն էր գրված»,- ասաց Արթուրը:

Նա փորձել է պարզաբանում ստանալ աշխատակիցներից, որոնք հայտնել են, թե իրենք անում են այն, ինչ ասել են տնօրենները:

Նշենք, որ վարչապետ Հովիկ Աբրահամյանն արդեն մի քանի օր հավաստիացնում է բոլորին, որ ավտոգազալցակայաններում գազի գինը հիմնականում 200 դրամ է, ոչ մի տեղ այն 230 դրամով չի վաճառվում: