Երեւանի քաղաքապետարանն արդեն մի քանի տարի է Հանրապետության հրապարակում ամանորյա տոնական օրերին գործունեություն ծավալելու համար Ձմեռ պապերին եւ Ձյունանուշներին տրամադրում է հատուկ հավաստագրեր:
Երեւանի քաղաքապետարանից հայտնում են, թե մասնագիտական խումբը, սահմանված չափորոշիչների համաձայն, գնահատում է կերպարների թե´ ընդհանուր արտաքին տեսքն ու մասնավորապես հանդերձանքը եւ թե´ երեխաների ու ծնողների հետ շփման ունակությունները, գրագետ խոսքը, ասմունքի վարպետությունը: Միջոցառման հիմնական նպատակը Ամանորի հեքիաթային մթնոլորտին համահունչ Ձմեռ պապերի եւ Ձյունանուշների ընտրությունն է: Այս տարի հավաստագրերի տրամադրման ընթացակարգին նախապես հերթագրվել եւ մասնակցել է շուրջ 60 Ձմեռ պապ եւ Ձյունանուշ, որոնցից, սակայն, ոչ բոլորն են համապատասխանել չափորոշիչներին եւ հավաստագիր ստացել: Հավաստագրեր են տրամադրվել նաեւ մուլտհերոսների որոշ կերպարների:
Քաղաքապետարանի առեւտրի եւ սպասարկումների, ինչպես նաեւ մշակույթի եւ տուրիզմի վարչություների աշխատակիցների կողմից տոնական օրերին հատուկ հսկողություն է սահմանվելու հավաստագիր ստացած Ձմեռ պապերի եւ Ձյունանուշների գործունեության նկատմամբ: Ծխելու, ոչ սթափ վիճակում գտնվելու կամ այլ խախտումների արձանագրման դեպքում այդ անձանց գործունեությունը տեղում դադարեցվելու է: