Թեւոսիկի եղբոր՝ Արթուր Սաֆարյանի սպանության գործով մեղադրյալ Տիգրան Ասատրյանին ազատ արձակվելուց հետո նրան չեն կանչել հարցաքննության եւ քննչական գործողությունների: Այս մասին NEWS.am-ի թղթակցի հետ զրույցում ասաց նրա փաստաբանը՝ Վարդուհի Էլբակյանը:
Նա նշեց, որ իր պաշտպանյալին կանչել են դատավարական գործընթացների, օրինակ՝ փորձաքննությունների եզրակացություններին, որոշումներին ծանոթանալու եւ այլն: Կոնկրետ Տիգրան Ասատրյանի մասով որեւէ նոր փորձաքննություն կամ որոշում չկա: Հարցին, թե հնարավոր է Թեւոսիկի ազատ արձակվելը ազդի այս գործի վրա, Վարդուհի Էլբակյանն ասաց, որ իր կարծիքով՝ դա որեւէ ազդեցություն չի ունենա: «Չեմ կարծում, որ ազդի, եթե Տիգրան Ասատրյանը որեւէ առնչություն եւ մեղավորություն չունի, չի կարող ազդել»,-ասաց փաստաբանը:
Նշենք, որ Տիգրան Ասատրյանը սպանվածի՝ Արթուր Սաֆարյանի կնքահայրն է: Ի դեպ, անձի առեւանգման մեղադրանքով կալանավորված Թեւոսիկը ազատ է արձակվել դեկտեմբերի 20-ին՝ նախնական կալանքի մեկ տարին լրանալու պատճառով:
Հիշեցնենք, որ հունվարի 27-ին, անհայտ անձը Արամի նրբանցքի շենքերից մեկի մուտքի մոտ կրակել եւ սպանել էր 41-ամյա Արթուր Սաֆարյանին՝ քրեական հեղինակություն «Թեւոսիկի եղբորը»: Դեպքի առթիվ հարուցվել էր քրեական գործ՝ ՀՀ քր-օրի 104 հոդվածի 1-ին մասի (սպանություն) եւ 235 հոդվածի (ապօրինի զենք-զինամթերք կրելը, պահելը, օգտագործելը) հատկանիշներով:
Ոստիկանները գործով կալանավորել են Իսրայել Սարգսյանին, որը Գոռ Վարդանյանի գլխավորած «Դուքենդո» ֆեդերացիայի անդամներից է, եւ Տիգրան Ասատրյանը: Քրեական գործով պարզվել էր, որ Իսրայել Սարգսյանն իր ընկեր Մովսես Ներսիսյանին պատվիրել է կատարել Արթուր Սաֆարյանի սպանությունը, իսկ կատարելուց հետո Մովսեսին սպանել է եւ դին տեղափոխել է Քանաքեռավանի դաշտ եւ նետել կոյուղու դիտահորը: Փետրվարի 18-ից փրկարարները ոստիկանների հետ որոնում են Մովսեսի դին, սակայն առայժմ չի հաջողվել գտնել:
