Նախկինում 7 անգամ դատապարտված, այժմ ավտոմեքենայի գողության մեջ մեղադրվող Հայկ Գալստյանը դեկտեմբերի 18-ին ներկայացել էր ոստիկանության 6-րդ վարչության աշխատակից եւ 2 քաղաքացիներից գումար խաբեությամբ գումար վերցրել:
Նոյեմբերի 7-ին մի վարորդ, իր վթարված մեքենան թողնելով Ավան թաղամասի փողոցներից մեկում, հեռացել էր, իսկ հաջորդ օրն առավոտյան պարզել էր, որ մեքենան գողացել են: Վերջինս դիմել էր ոստիկաններին, որոնք էլ ընդամենը մեկ օր անց պարզել էին կասկածյալի ինքնությունը՝ նախկինում գողության, խարդախության համար դատապարտված Հայկ Գալստյան: Նոյեմբերի 10-ին Հայկ Գալստյանն ինքնակամ ներկայացել է բաժին եւ տվել խոստովանական ցուցմունք: Այս գործով ընթացող նախաքննության ընթացքում ժամանակ առ ժամանակ Հայկ Գալստյանը հրավիրվել է ոստիկանություն:
Դեկտեմբերի 18-ին ոստիկանությունում Հայկ Գալստյանը լսել էր, որ երկու քաղաքացի են դիմել՝ պարզելու բանկում հաշվեհամարի թյուրիմացությունը: Բակում Հայկը մոտեցել էր նրանց եւ ներկայանալով ոստիկանության 6-րդ վարչության աշխատակից՝ առաջարկել հաջորդ օրը հանդիպել խնդիրը լուծելու համար:
«Եկավ, ասաց, որ պետք է 50 հազար վճարենք, որ մեզ օգնի, բայց այդքան չունեինք, 37 հազար տվեցինք, անձնագրի պատճենն ու բանկային քարտը վերցրեց ու գնաց: Զգացինք՝ մի բան այն չէ, դիմեցինք ոստիկանություն, պարզվեց՝ մեզ խաբել են»,- դեկտեմբերի 19-ին ոստիկանությունում պատմել են քաղաքացիները:
Նախաքննությունը շարունակվում է:
Մանրամասները՝ ոստիկանության պատրաստած տեսանյութում:
