Anunak անվանումով հաքերների խմբի գործունեությունը հայտնվել է ռուսական Group-IB ընկերության հաշվետվության մեջ: Վերլուծաբանները հաշվարկել են, որ չարագործներին հաջողվել է բանկերից 1 մլրդ ռուբլի գողանալ, ընդ որում, գողությունների մեծ մասը կատարվել է 2014 թվականի երկրորդ կեսին:
«Ռոսիյսկայա գազետա»-ի փոխանցմամբ, հարձակման են ենթարկվել ռուսական ավելի քան 50 բանկեր եւ 5 վճարային համակարգեր Ռուսաստանի եւ ԱՊՀ-ի տարածքում: Տուժել են միայն ֆինանսական հաստատությունները, իսկ հաճախորդների հաշիվներից ոչինչ չի գողացվել:
Anunak-ը ձեւավորել են Carberp հայտնի խմբավորման անդամները: Ի տարբերություն նախորդ խմբի՝ Anunak-ի անդամները որոշել են միանգամից խոշոր գումարներ գողանալ: Հասկանալով, որ միանգամից 2 մլն դոլար գողանալն ավելի դյուրին է, քան հազար անգամ՝ 2.000 դոլար, նրանք որոշել են գործել մշակված սխեմայով:
Նախ կոտրել են գործընկերոջ կամ բանկի հաճախորդի փոստը, այնուհետեւ հաստատությանը հատուկ վիրուսով նամակ են ուղարկել, որը ներթափանցել է բանկի համակարգչային ցանց: Վիրուսը սքանավորել է ներքին ցանցը եւ ապահովել բանկային համակարգի հասանելիությունը: Խմբավորմանը 42 օր է անհրաժեշտ եղել՝ բանկը «մշակելու» եւ շուրջ 2 մլն դոլար գողանալու համար:
Anunak-ի անդամները նաեւ սովորել են դատարկել բանկոմատները: Ընդհանուր առմամբ, հինգ խումբ է գործել, յուրաքանչյուրում՝ 15-20 մարդ: Յուրաքանչյուր խումբ աշխատել է Ռուսաստանի եւ ԱՊՀ-ի որոշակի կետում: Վերջին շրջանում խմբավորումը «դուրս է եկել» նաեւ եվրոպական շուկա, որտեղ հարձակումների թիրախ են դարձել մանրածախ ցանցերը, գլխավորաբար՝ POS-տերմինալները:
Դրանից հետո հետաքննությանը միացել է նաեւ Fox-IT-ի հոլանդական փորձագետների խումբը: Կասկած կա, որ հաքերները լրտեսությամբ են զբաղվում. նրանց հասանելի է ներքին նամակագրությունը, ինչի արդյունքում փակ տեղեկությունները վաճառվում են հաճախորդներին: