Դանդաղ, սակայն հաստատուն կերպով Հայաստանում հանրային նոր քննարկումների ձեւաչափ է հասունանում: Այդ մասին NEWS.am-ի թղթակցի հետ զրույցում ասել է թուքագետ, ՀՀ Արեւելագիտության ինստիտուտի Թուրքիայի բաժնի ավագ գիտաշխատող Վահրամ Տեր-Մաթեւոսյանը՝ մանրամասնելով,թ ե ինչ ակնկալիքներ կարող ՝ ունենալ հայ ժողովուրդը Ցեղասպանության 100-րդ տարելիցի նախաշեմին:
Ըստ թուրքագետի, մասնագիտական, քաղաքական ու հոգեւոր շրջանակներում վերջին մի քանի տարիներին ակտիվորեն քննարկվում են Ցեղասպանության հետեւանքների վերացման եւ փոխհատուցման ուղղությամբ գործնական քայլեր նախաձեռնելու վերաբերյալ հնարավոր տարբերակները: «Բացառությամբ Սիսի կաթողիկոսության վերաբերյալ Արամ Ա-ի հայտարարության, մասամբ նաեւ Փերինչեքի գործի վերաբերյալ զարգացումներին, թվում է, թե այլ մեծածավալ աշխատանք չի տարվում: Սակայն ակնհայտ է, որ տեղի է ունենում մտածելակերպի եւ հռետորաբանության փոփոխություն: Ավելի ակնհայտ է այն իրողությունը, որ մեր հասարակության ու սփյուռքի ավելի ու ավելի լայն շրջանակներ սկսում են այդ փոփոխության մաս դառնալ»,- արձանագրել է Տեր-Մաթեւոսյանը՝ նշելով, որ վերնախավային քննարկումներից փուլից այդ թեման թեւակոխել է հասարակության ներգրավման փուլ:
«Հայ հասարակությունը գիտակցում է, որ Ցեղասպանության դատապարտմամբ ու ճանաչմամբ շատ հարցեր չեն լուծվի, հետեւաբար, պետք է փոխել պայքարի ու պահանջատիրության եւ ձեւը, եւ բովանդակությունը: Մի քանի առիթներով ասել եմ. ցանկանում եմ, որ 2015 թվականը հայության համար ունենա այն նույն հոգեւոր ու գաղափարական վերելքի նշանակությունը, ինչն ունեցավ 1965 թվականը: 2015 թ. պետք է նշմարենք ապագայի պատասխանի ուրվագծերը: Մենք պետք է համազգային նոր օրակարգ մշակենք, քաջություն ունենանք մերժել արատավորը եւ խրախուսենք դրականը: Ցանկանում եմ, որ 2015 թվականի խորհուրդը լինի իրավիճակ ու ներկան փոխող»,- նշել է Վահրամ Տեր-Մաթեւոսյանը:
