Ուկրաինայի նախագահ Պյոտր Պորոշենկոն դեկտեմբերի 22-ին հեռախոսազրույց է ունեցել Ֆրանսիայի նախագահ Ֆրանսուա Օլանդի, Գերմանիայի կանցլեր Անգելա Մերկելի եւ Ռուսաստանի նախագահ Վլադիմիր Պուտինի հետ: Այս մասին հաղորդում է ՈՒՆԻԱՆ գործակալությունը՝ վկայակոչելով երկրի ղեկավարի մամուլի ծառայությանը:
Կողմերը քննարկել են Դոնբասում տիրող իրավիճակն ու սեպտեմբերի 5-ի Մինսկի Արձանագրության եւ սեպտեմբերի 19-ի Մինսկի Հուշագրի իրականացման ընթացքը:
Նախագահներն ու կանցլերը պայմանավորվել են նաեւ դեկտեմբերի 24-ին եւ 26-ին շփման խմբի հանդիպումներ անցկացնել՝ Մինսկի պայմանավորվածությունների իրագործման հարցում առաջընթաց ապահովելու համար:
Նշվում է, որ զրուցակիցները համաձայնել են Մինսկի պայմանավորվածությունների բոլոր կետերը կատարելու անհրաժեշտության հարցում, որոնց թվում են հրադադարի, տարանջատման գիծ գալու հարցերը, որոնք ամրագրված են սեպտեմբերի 19-ի Հուշագրում, զորքերի եւ ծանր զինտեխնիկայի դուրսբերումը, ինչպես նաեւ ձերբակալված Նադեժդա Սավչենկոյի շուտափույթ ազատ արձակումը:
Պյոտր Պորոշենկոն, Անգելա Մերկելը, Ֆրանսուա Օլանդն ու Վլադիմիր Պուտինը պայմանավորվել են հեռախոսային խորհրդակցությունները շարունակել մի քանի օր անց: