Մոսկվայում սկսվել է ՀԱՊԿ ղեկավար մարմնի՝ Հավաքական անվտանգության խորհրդի նիստը, որը վարում է Տաջիկստանի նախագահ Էմոմալի Ռահմոնը: Դեկտեմբերի 23-ին ՀԱՊԿ նախագահությունը Ռուսաստանից փոխանցվել է այդ երկրին: Նախքան միջոցառումը սկսելը ՌԴ նախագահ Վլադիմիր Պուտինը ողջունել է Հայաստանի, Բելառուսի, Ղազախստանի եւ Տաջիկստանի իր գործընկերներին, փոխանցում է «ՌԻԱ Նովոստին»:
Գագաթաժողովի շրջանակում նախատեսվում է ստորագրել մի շարք փաստաթղթեր, լրագրողներին հայտնել է ՌԴ նախագահի օգնական Յուրի Ուշակովը:
Սկզբում կանցկացվի նեղ ձեւաչափով նիստ՝ պետությունների ղեկավարների մասնակցությամբ: Այնուհետեւ տեղի կունենա ընդլայնված կազմով նիստը: Նախատեսվում է ստորագրել 22 փաստաթուղթ, որոնցից մեկը հայտարարություն է, 19-ը՝ խորհրդի որոշում եւ երկու արձանագրություն:
Նախատեսված որոշումների մեջ կան հակաթմրանյութային ռազմավարության փաստաթղթեր, արտակարգ իրավիճակներում հավաքական արձագանքման համակարգի զարգացման միջոցառումների ծրագիր, տեղեկատվական ոլորտում հանցավոր գործունեությանը դիմակայելու փոխգործակցության համաձայնագիր:
ՀԱՊԿ պետությունների ղեկավարների հայտարարությունում, ըստ Ուշակովի, մտահոգություն կհայտնվի Կենտրոնական Ասիայում ահաբեկչության աճի եւ ծայրահեղականության տարածման կապակցությամբ, այդ թվում հաշվի առնելով աֆղանական գործոնը, կընդգծվի Ուկրաինայում խաղաղության հաստատման եւ ղարաբաղյան հարցի խաղաղ կարգավորման անհրաժեշտությունը: Նաեւ մեծ ուշադրություն կդարձվի թմրաթրաֆիքի դեմ պայքարին եւ կիբերհանցագործություններին:
