Հայ եւ միջազգային իրավաբանները Հայոց ցեղասպանության ժամանակ սպանվածների կտակների վերլուծություն կիրականացնեն: Այդ մասին այսօր՝ դեկտեմբերի 25-ին, հայտարարեց սփյուռքի նախարար Հրանուշ Հակոբյանը: Նրա խոսքով՝ Երեւանի պետական համալսարանի իրավաբանական ֆակուլտետի մասնագետները եւ միջազգային իրավագետները կհետազոտեն, թե ինչպիսի իրավական ուժ կարող են ունենալ այդ փաստաթղթերը փոխհատուցման մասին պահանջները ձեւակերերպելու տեսակետից: Բնականաբար, հասկանալի պատճառներով դրանք պահպանվել են ոչ բոլորի մոտ:
«Իրավահաջորդների համար, որոնց ժառանգություն, ունեցվածքի նկարագրություն կամ ապահովագրություն չունեն, կարելի է ընդունել միջինացված գումար, ասենք ամեն ընտանիքի համար 50 հազար դոլար», - հավելեց Հակոբյանը: Հարցին՝ կարո՞ղ է, արդյոք, նախարարությունը հայոց աշխարհի անունից այդ պահանջները առաջ քաշել թուրքական կառավարությանը, Հակոբյանը պատասխանեց. Խոսքը անհատական պահանջների մասին է: Եթե խոսենք հավաքական պահանջների մասին, ապա կարելի է դրանք եւս կազմել: «Եթե դուք հարցնում եք, ապա այո, պահանջում եմ նաեւ ես: Պահանջում եմ այն միլիոնավոր, միլիարդավոր դոլարների վնասը, որը կրում է Հայաստանը Թուրքիայի հետ սահմանի փակման պատճառով: Պահանջում եմ 1915թ. սպանվածների չծնված միլիոնավոր երեխաների համար: Պահանջում եմ այն անհանգստության համար, որ մեր հայրենակիցները տասնամյակներ շարունակ զգում են, քանի որ այդ հարցը լուծված չէ», - ընդգծեց սփյուռքի նախարարը: