Ինչպես եւ անցյալ տարիներին, Անկարան 2014 թվականին հնարավոր ամեն ինչ արել է՝ տարածաշրջանի երեք երկրների՝ Հայաստանի, Ադրբեջանի եւ Վրաստանի հետ իր հարաբերությունները զարգացնելու համար: Նման կարծիք է հայտնում թուրքական «Today's Zaman» անգլալեզու պարբերականը:
«Չնայած Թուրքիայի հաստատած հավասարակշռված կապերին, որը փորձում է իրեն որպես օրինակելի մոդել ներկայացնել՝ կապեր ունենալով Արեւմուտքի եւ ՆԱՏՕ-ի, Ռուսաստանի եւ Իրանի հետ, Անկարայի հաջող արտաքին քաղաքականությունը հիմնվում է տարածաշրջանային գործընկեր Ադրբեջանի հետ հարաբերությունների վրա. շրջանի տնտեսական ուժը՝ հսկայական էներգետիկ ռեսուրսներով, որոնք կարեւոր են Թուրքիային էներգետիկ հանգույցի եւ տարանցիկ միջանցքի վերածելու համար»,- գրում է պարբերականը:
Ըստ թերթի, այդ նպատակով 2013 թվականի վերջին «Անկարան կանգ չառավ, այլ ընդլայնեց իր ջանքերը, որպեսզի տեղից շարժի թուրք-հայկական կապերը»: Այն ժամանակվա ԱԳ նախարար, ներկայում Թուրքիայի վարչապետ Ահմեդ Դավութօղլուն Երեւան այցելեց: «Այցը դրական արդյունքներ չտվեց, քանի որ կողմերից ոչ մեկը պատրաստ չէր զիջումների գնալ»,- նշված է հոդվածում:
Թերթը կարծիք է հայտնում, որ ղարաբաղյան հակամարտությունը կրկին ցուցանիշ է դարձել տարածաշրջանում խաղաղարար դառնալու՝ Թուրքիայի անհաջող ձգտումների համար: «Թուրքիայի եւ Հայաստանի միջեւ սահմանների փակումը վաղուց արդեն կարեւոր տարր են համարում՝ հատկապես Հայաստանի մեկուսացման ճանապարհով հակամարտության կարգավորման հասնելու համար, որը նաեւ կաջակցի դաշնակցին՝ Ադրբեջանին: Ամեն դեպքում, մինչեւ հիմա որեւէ դրական արդյունք չի արձանագրվել, եւ ստատուս-քվոն պահպանվում է»,- գրում է թերթը:
Հոդվածում ներկայացվում են Թուրքիայի միջազգային հարաբերությունների գծող մասնագետ եւ գիտնական Սեդաթ Լաչիների խոսքերը, որն ընդգծել է Ադրբեջանի դերը հայ-թուրքական 2009 թվականի արձանագրությունների հետագա առաջընթացի կանխարգելման գործում: «Հիմա Ադրբեջանի հետ դաշինքը պատանդառել է Հայաստանի հետ հարաբերությունները»,- ասել է նա: