2010 հուլիս 8-ին, 59 տարեկան հասակում քաղցկեղից վախճանվել է «Ուշիմ համակարգեր» (Intelligent Systems) ասպարեզի անվանի գիտնական, պրոֆեսոր Կարո Լուկասը։
Կարո Լուկասը (Ղուկասյանը) ծնվել է 1951 թվականին Իրանի Իսֆահան (Սպահան) քաղաքի Նոր Ջուղա հայկական թաղամասում եւ ավարտել է Թեհրանի ազգային Քուշեշ Մարիամյան դպրոցը, ապա 1973 թվականին Թեհրանի Համալսարանի ճարտարագիտական (տեխնիկական) ֆակուլտետում ստացել բարձրագույն կրթություն (MSc) էլեկտրոնիկայի եւ համակարգչային տեխնոլոգիայի բնագավառում։ 1976 թվականին ստացել է դոկտորական (PhD) կոչում Կալիֆորնիայի աշխարհահռչակ Բերքլիի համալսարանում:
1993-97 թվականներին եղել է Հիմնարար Գիտությունների Հետազոտական Կենտրոնի (IPM) տնօրենը, որը համարվում է Իրանի առաջնատար գիտական կազմակերպություններից մեկը: 1986-88 թվականներին ղեկավարել է Թեհրանի Համալսարանի Էլեկտրոնիկայի ճարտարագիտության ֆակուլտետը:
Չափազանց մեծ է պրոֆեսոր Կարո Լուկասի ներդրումը Իրանի եւ միջազգային գիտական ասպարեզում։ Նա հեղինակել է ավելի քան 1200 գիտահետազոտական հոդվածներ, ներկայացրել է ավելի քան 200 դասախոսական ելույթներ միջազգային գիտաժողովներում, եղել է 20 միջազգային գիտական պարբերականների խմբագրական կազմում եւ շուրջ 100 միջազգային կոնֆերանսների կազմակերպչական հանձնախմբերում, եւ հեղինակն է 8 գրքերի ու համահեղինակը 39 գիտական խմբագրված հավաքածուների:
Մեծ է նաեւ պրոֆեսոր Կարո Լուկասի մանկավարժական ավանդը: Նա շուրջ 30 տարի դասավանդել է Իրանի եւ միջազգային ճանաչված, այդ թվում՝ Կալիֆորնիայի Բերքլիի, Կանադայի Տորոնտոյի, եւ Կալիֆորնիայի Յու Սի Էլ Էյ (UCLA) համալսարաններում: Պրոֆեսոր Կարո Լուկասը ղեկավարել է հազարավոր մագիստրոսական ու դոկտորական ավարտաճառեր, եւ մեծ հարգանք է վայելում Իրանի ճարտարագետ ուսանողների ու փորձագետների, ինչպես նաեւ պետական պաշտոնյաների մոտ:
2006 թվականին Կարո Լուկասը ճանաչվել է Իրանի ճարտարագիտական ասպարեզում Մնայուն Դեմքը (Eternal Figure) եւ պարգեւատրվել է Իրանի նախագահի կողմից:
Պրոֆեսոր Կարո Լուկասին անվանում են Իրանի ռոբոտիկայի գիտության հայր:
Պրոֆեսոր Կարո Լուկասը անդամակցել է 2007 թվականի ամռանը Կալիֆորնիայի Սան Ֆրանցիսկո քաղաքում տեղի ունեցած Տեխնոլոգիայի համահայկական վեհաժողովը (ArmTech 2007) նախապատրաստող հանձնախմբին: