Տարեմուտի առթիվ Ֆինանսների նախարար Գագիկ Խաչատրյանը դեկտեմբերի 27-ին պարգեւատրել է համակարգի մի խումբ աշխատակիցների: Ձեւավորված ավանդույթի համաձայն` Ֆինանսների նախարարն անձամբ է խրախուսել այն աշխատակիցներին, ում դրսեւորած ջանքերով համակարգի ձեռքբերումներն ավելի առարկայական են դարձել 2014 թվականի ընթացքում: Պարգեւատրման հանդիսավոր արարողությունը, ի դեպ, տեղի է ունեցել Ֆինանսների նախարարության հիմնովին վերանորոգված դահլիճում: Մաքսային գործի բնագավառում հատուկ ծառայությունների համար Ֆինանսների նախարարի հրամանով մի շարք աշխատակիցներ պարգեւատրվել են «ՀՀ պատվավոր մաքսային ծառայող» եւ «Մաքսային ծառայության առաջավոր» կրծքանշաններով: Գերազանց ծառայության համար նախարարի հրամանով մի շարք աշխատակցիների խրախուսման կարգով արտահերթ շնորհվել են դասային եւ հատուկ կոչումներ: Նախարարի մեկ այլ հրամանով խրախուսման կարգով 3 աշխատակցի հատկացվել է բնակարան:
Ծառայողական պարտականությունները բարեխղճորեն կատարելու եւ աշխատանքի նկատմամբ նվիրվածություն ցուցաբերելու, գերազանց եւ բարեխիղճ ծառայության համար նախարարության մի խումբ աշխատակիցներ հուշանվերներ են ստացել: Իսկ 27 աշխատակցի հայտարարվել է շնորհակալություն, 400 աշխատակիցների շնորհվել են հարկային, մաքսային եւ քաղաքացիական ծառայությունների դասային եւ հատուկ կոչումներ, եւս 125 աշխատակից արժանացել է դրամական պարգեւի, ինչպես նաեւ բարձրացվել են 109 հարկային եւ մաքսային ծառայողների պաշտոններ:
Ֆինանսների նախարարության տոնական միջոցառմանը միացել է նաեւ ՀՀ վարչապետ Հովիկ Աբրահամյանը` համակարգի աշխատակիցներին շնորհավորելով գալիք տոների կապակցությամբ:
