Ոչ իշխանական Եռյակի թաքնված նպատակը ներկայիս կառավարության փոփոխություն թույլ չտալն է։ Այս մասին այսօր՝դեկտեմբերի 29-ին, լրագրողների հետ հանդիպմանն ասաց քաղաքական վերլուծաբան, «Միջազգային և անվտանգության հարցերի հայկական ինստիտուտի» հիմնադիր-նախագահ Ստյոպա Սաֆարյանը՝ ավելացնելով, որ տարեվերջի ԵՏՄ անդամակցությունը, գնաճը, շուկայի ապակայունացումը միանգամայն բավարար էին ցանկացած քաղաքական ուժի համար՝ բողոքի լուրջ գործողություններ ձեռնարկելու։
«Հայաստանի ընդդիմությունն իրեն դրել է ռուսական դաշտում, բնականաբար, նրանք չէին կարող դեմ դուրս գալ եւ առաջնորդել բողոքի ակցիաներ։ Այս իրավիճակը, որը գնալով ավելի է վատթարանալու հաջորդ տարում ԵՏՄ տնտեսական չափանիշներին հարմարվելու առումով, թերեւս ավելի են բարդացնելու իրավիճակը եւ ավելի թուլացնելու կառավարության դիրքերը, բայց հաշվի առնելով իշխանությունների եւ ոչ իշխանական ուժերի կապը՝ ԲՀԿ-ի թիվ մեկ առաքելությունը լինելու է կառավարության փոփոխություն թույլ չտալը, քան որևէ այլ արտահերթ գործողությունների համակարգումը»,- նշեց վերլուծաբանը։
Ստյոպա Սաֆարյանի կարծիքով՝ կառավարության անփոփոխելիությունը՝ ի դեմս Հովիկ Աբրահամյանի, Եռյակից չափազանց ցանկալի է հենց ԲՀԿ-ի համար։
«Ինքն է Եռյակում առավելապես թելադրողը թե´ կազմակերպչական, թե´ռեսուրսների, թե´ ֆինանսների առումով, եւ նա չունի շուտափույթ իշխանափոխության հրամայանական կամ օրակարգային խնդիր։ Հիմնական խնդիրը այս իրավիճակի պահպանումն է մինչեւ 2017թ., քանի որ ԲՀԿ-ն թերեւս կարող է ուղղակի հաշվարկել, որ եթե մինչեւ այդ պահպանվի այս իրավիճակը, այս կառավարության առկայությունը եւ շարունակական թուլացումը կարող է օգնել իրեն ավելի հեշտ հաղթել ընտրություններում իշխող կուսակցությանը»,- ասաց Ստյոպա Սաֆարյանը։