Ամերիկյան առեւտրի պալատը Հայաստանում (American Chamber of Commerce in Armenia - AmCham) հուլիսի 9-ին նշեց իր գործունեության 10-ամյակը:
«Ամերիկյան առեւտրի պալատը Հայաստանում` AmCham-ը, հսկայական նշանակություն ունի արեւմտյան լավագույն բիզնես փորձառությունը հայաստանյան ընկերությունների հետ կիսելու առումով»,- շնորհավորելով Հայաստանում Ամերիկյան Առեւտրի պալատի 10-ամյակը՝ ասաց Հայաստանում ԱՄՆ արտակարգ եւ լիազոր դեսպան Մարի Յովանովիչը` ավելացնելով, որ ինքն ուրախ է, որ ԱՄՆ դեսպանատունը համագործակցում է այս կառույցի հետ, եւ համատեղ մի շարք ծրագրեր են իրականացրել:
«Մենք ողջունում ենք նման կառույցի գործունեությունը, քանի որ այն նպաստում է Հայաստանում ժողովրդավարական պայմաններ ստեղծելուն եւ տնտեսական առաջընթաց արձանագրելու համար, ինչը կարող է նպաստել, որպեսզի ավելի շատ օտարերկրյա ներդրողներ գան Հայաստան»,- ասաց դեսպանը:
«Մեր անդամ կազմակերպությունները բարձրացնում են խնդիրներ, որոնց հետ նրանք առնչվում են իրենց առօրյա բիզնես գործունեության ընթացքում»,-NEWS.am-Ինովացիայի թղթակցի հետ հարզազրույցում ասաց AmCham-ի գործադիր տնօրեն Դիանա Գազիյանը` նշելով, որ իրենց կառույցի կազմում գտնվող կազմակերպությունները միասին եւ համատեղ ջանքերով կարողանում են շատ ավելի դրական արդյունքների հասնել, քան յուրաքանչյուրը առանձին-առանձին:
Amcham-ի գործադիր տնօրենի խոսքով` իրենք ակտիվ են եղել հարկային բարեփոխումների առումով եւ արտահանող կազմակերպությունների համար ԱԱՀ-ի գերավճարի վերադարձի առումով որոշ նվաճումներ են արձանագրել:
Նշենք, որ միջոցառումը եզրափակվեց մրցանակաբաշխությամբ՝ AmCham-ի շուրջ 15 անդամներ տարբեր անվանակարգերում պարգեւատրվեցին: Տոնական արարողությանը ելույթ ունեցավ նաեւ «Բամբիռ» ռոք խումբը։
Տեղեկացնենք, որ Ամերիկյան առեւտրի պալատը Հայաստանում հիմնվել է 2000 թվականին։ Անդամներն են օտարերկրյա կապիտալով աշխատող 85 կազմակերպություններ, ինչպես՝«Արմենիա Մարիոթը», «Ամերիա» ընկերությունների խումբը, «Արսօյլը», «Ավստրիական ավիաուղիները», «Էյչ-Էս-Բի-Սի Բանկ Հայաստանը», «Ինգո Արմենիան» եւ այլն: