Ներկայումս Ֆրանսիայում տեղի ունեցող իրադարձությունները, մեղմ ասած, երկրի ղեկավարության սխալների հետեւանք են: Այս մասին NEWS.am-ի թղթակցի հետ զրույցում նշել է Աշխարհաքաղաքական վերլուծության եվրոպական կենտրոնի ղեկավար, լեհ փորձագետ Մատեուշ Պիսկորսկին:
Նրա համոզմամբ՝ ԵՄ մի շարք երկրներ, այդ թվում Ֆրանսիան, շատ ակտիվորեն աջակցում են Մերձավոր Արեւելքում, մասնավորապես Սիրիայում գործող իսլամիստական խմբավորումներին:
«Կարող ենք ասել, որ իրականում մարդիկ, որոնք արդեն ահաբեկչություններ են իրականացնում ԵՄ երկրներում, ուղղակիորեն կապված են այն մարդկանց հետ, որոնք էթնիկ եւ կրոնական զտումներ են իրականացնում Մերձավոր Արեւելքի երկրներում՝ Սիրիայում եւ Իրաքում: Հետեւաբար, այն ինչ ստեղծվել է Մերձավոր Արեւելքում ամերիկյան պլաններով, այսպես կոչված «վերահսկելի քաոսը», այժմ պիտի իր արտացոլումը գտնի ԱՄՆ դաշնակից երկրների անվտանգության մակարդակում»,-ասել է Պիսկորսկին:
Նա հավելել , որ ԱՄՆ հիմնական դաշնակիցներից մեկն այդ առումով Ֆրանսիան է: «Այն, ինչին մենք ականատես ենք լինում, մեղմ ասած, Ֆրանսիայի ղեկավարության սխալների հետեւանքն է, որն ամբողջությամբ վերահսկում է ԱՄՆ-ը, ինչպես նաեւ Ֆրանսիայի ոչ գրագետ միգրացիոն քաղաքականության հետեւանք է, երբ մահմեդականները եւ արաբական համայնքների ներկայացուցիչները ինտեգրվում են Ֆրանսիայի պետության սոցիալական ու քաղաքական կառույցներ»,-ընդգծել է լեհ փորձագետը:
Նրա խոսքով, ցավոք, այդ ամենը կարող է հանգեցնել քաղաքացիական պատերազմի Ֆրանսիայում: «Դա կարող է հանգեցնել արմատական իսլամիստական խմբավորումների ազդեցության աճի, ուստի Ֆրանսիայում պետք է սպասել եւ քաղաքական, եւ սոցիալական լարվածության, ինչը կբերի զանգվածային անկարգությունների, որոնք արդեն տեղի են ունեցել 2007 թվականին»,-ամփոփել է փորձագետը:
