Ռուսաստանի եւ Անդրկովկասի միջեւ հաղորդակցությունը անհրաժեշտ է առավելագույնս զարգացնել Կովկասյան լեռնաշղթայի միջոցով: Այդ մասին NEWS.am-ի թղթակցի հետ զրույցի ժամանակ հայտարարել է ռուս քաղաքագետ Ալեքսանդր Սկակովը:
Անդրադառնալով վրացական «PetrocasEnergyGroup» ընկերության եւ ռուսական «Ռոսնեֆթ» պետական ընկերության միջեւ կնքված գործարքին՝ փորձագետը ընդգծել է, որ Հայաստանի համար, իհարկե, Ռուսաստանի եւ Վրաստանի միջեւ հարաբերությունների բարելավումը շատ կարեւոր է: «Այստեղ էլ ավելի կարեւոր է այն հարցը, որ այսօր Ռուսաստանը Հայաստանի հետ կապող միայն մեկ ճանապարհ գոյություն ունի, իսկ դա շատ քիչ է: Բոլորին հայտնի է, որ այնտեղ մշտապես խցանումներ են, խնդիրներ, վթարներ եւ այլն: Իհարկե, անհրաժեշտ է նոր ճանապարհ կառուցել, եւ իհարկե, անհրաժեշտ է աշխատող երկաթուղու առկայություն», - ասել է Սկակովը: Միաժամանակ նա ընդգծել է, որ քանի որ Աբխազիայի կարգավիճակը որոշված չէ, հաղորդակցության վերականգնումը անիրական է: «Պետք է մտածել նոր նախագծերի շուրջ, այսինքն, հնարավոր է, որ կողմերը վերադառնան երկաթուղու սառեցված նախագծին: Այսինքն, Ռուսաստանի եւ Անդրկովկասի միջեւ հաղորդակցությունը անհրաժեշտ է առավելագույնս զարգացնել Կովկասյան լեռնաշղթայի միջոցով: Սա շահավետ կլինի եւ Վրաստանի, եւ Ռուսաստանի, եւ Թուրքիայի համար»,- ընդգծել է Սկակովը:
Վրացական Petrocas Energy Group-ի եւ «Ռոսնեֆթ» ռուսական ընկերությունը խոշոր գործարք են կնքել, ըստ որի միլիարդատեր Դավիդ Յակոբաշվիլիին պատկանող Petrocas-ը «Ռոսնեֆթին» է վաճառել բաժնետոմսերի 49%-ը: Դավիդ Յակոբաշվիլիի ընկերությունը տիրապետում է Փոթի նավահանգստային քաղաքի մոտակայքում գտնվող նավթային տերմինալին: Վերջին տարիներին «Ռոսնեֆթն» այդ տերմինալն օգտագործել է դեպի Հայաստան նավթի եւ նավթամթերքների վերաբեռնման համար: Դատելով ամեն ինչից՝ Մոսկվայում որոշել են ուժեղացնել Եվրասիական տնտեսական միություն մտած պետությանը նավթամթերքների մատակարարման գծի նկատմամբ վերահսկողությունը: Նման աշխարհաքաղաքական մոտեցումը լիովին տեղավորվում է Կրեմլի՝ ՌԴ-ն Հարավային Կովկասի հետ միացնող նոր հաղորդակցությունների կառուցման եւ հների վերականգնման ռազմավարության մեջ: Մասնավորապես, խոսքը Աբխազիայի միջով երկաթուղային երթեւեկության վերականգնման եւ Ավարոկախեթինյան ավտոմայրուղու վերականգնման մասին է:
