«Ես հիմա տղամարդավարի ասում եմ, որ ես 100 տոկոսով դիմելու եմ այս պահանջով ՌԴ գլխավոր դատախազին»: Գյումրիում՝ դատախազության շենքի առջեւ հավաքված ցուցարարներին ասել է Հայաստանի գլխավոր դատախազ Գեւորգ Կոստանյանը՝ նշելով, որ սարսափելի սպանդի մեջ մեղադրվող Վալերի Պերմյակովին հայկական կողմին հանձնելու պահանջով դիմելու է ՌԴ դատախազությանը:
«Արդյոք ես դիմելո՞ւ եմ ՌԴ գլխավոր դատախազին եւ իրավապահ մարմիններին, որ Ռուսաստանում հարուցված քրեական գործն ու տվյալ անձն ամբողջությամբ տրամադրվի մեր տրամադրության տակ: Ես հիմա տղամարդավարի ասում եմ, որ ես 100 տոկոսով դիմելու եմ այս պահանջով ՌԴ գլխավոր դատախազին»,- ասել է նա: Ցուցարարներն այս հայտարարությունն ընդունել են ծափերով ու ոգեւորված բացականչություններով. «Հիմա, հիմա»:
ՀԱԵ Շիրակի թեմի առաջնորդ, Միքայել արքեպիսկոպոս Աջապահյանն իր հերթին նշել է. «Ես նոր մտա ներս, զրույց ունեցանք գլխավոր դատախազի հետ՝ ԱԺ պատգամավորի, մարզի դատախազի ներկայությամբ: Ես ինքն այն համոզումը կազմեցի ինձ համար, որ գլխավոր դատախազն անելու է ամեն ինչ, որպեսզի կատարվի մեր կամքը: Պարզապես պետք է որոշակի ժամանակահատված քննչական աշխատանքի համար»,- նշել է նա: Աջապահյանին ընդհատել են ցուցարարները՝ վանկարկելով. «Հիմա, հիմա»:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դուստրը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց: Նրա վիճակը կայուն ծանր է:
Կասկածյալը՝ ռուս զինվորական Վալերի Պավելի Պերմյակովը ձերբակալվեց նույն օրը կեսգիշերին մոտ, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում ռուսական ռազմակայանում:: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
ՀՀ գլխավոր դատախազության մեկնաբանմամբ, Պերմյակովը գտնվում է ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում: