Գյումրիի քաղաքապետ Սամվել Բալասանյանն այսօր՝ հունվարի 16-ին, ընդունել է դաժանաբար սպանված Ավետիսյանների հարազատներին:
Ինչպես քաղաքապետարանից հաղորդում է NEWS.am-ի թղթակիցը, Սամվել Բալասանյանը հարազատներին հայտնել է, որ ամբողջ ծախսերը հոգալու է քաղաքապետարանը, իսկ հունվարի 19-ից արդեն բացվելու է հաշվեհամար՝ սպանդից փրկված 6-ամսական փոքրիկի համար: Հաշվեհամարը բացվելու է Սերյոժա Ավետիսյանի քրոջ՝ Անահիտ Ավետիսյանի անունով:
Բացի դրանից՝ Ավետիսյանների հարազատները խնդրել են քաղաքապետին խոսել պաշտպանության նախարարության հետ, որ թույլ տան սպանված Արաքսյա Պողոսյանի եղբորը, որը զինծառայող է, եւս 5 օր մնալ Գյումրիում:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դուստրը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց: Նրա վիճակը կայուն ծանր է:
Կասկածյալը՝ ռուս զինվորական Վալերի Պավելի Պերմյակովը ձերբակալվել է նույն օրը կեսգիշերին մոտ, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել են եւ մեղադրանք են առաջադրել Ռուսաստանի Դաշնության Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
ՀՀ գլխավոր դատախազության մեկնաբանմամբ, նա գտնվում է ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում: