Գյումրիում տեղի ունեցած մեծ ողբերգության գործի քննության աշխատանքների արդյունավետությունը ապահովելու նպատակով ՀՀ եւ ՌԴ Քննչական կոմիտեները կստեղծեն համակարգող մարմին: Այս մասին NEWS.am-ի թղթակցի հետ զրույցում ասաց Քննչական կոմիտեի նախագահի խորհրդական Սոնա Տռուզյանը:
Նա նշեց, որ երկօրյա բանակցությունների արդյունքում պայմանավորվել են համատեղ եւ փոխհամագործակցված գործողություններ իրականացնել՝ ապահովելու գործի քննության բազմակողմանիությունը, լրիվությունը:
ՌԴ ՔԿ ներկայացուցիչ Վլադիմիր Մարկինն իր հերթին նշել է, թե ՌԴ եւ ՀՀ Քննչական կոմիտեների նախագահներ Ալեքսանդր Բաստրիկինը եւ Աղվան Հովսեփյանը պայմանավորվել են Գյումրիում ամբողջ ընտանիքի սպանության գործի համատեղ հետաքննության մասին:
«Համակարգելով քննչական խմբերի աշխատանքը՝ Բաստրիկինը եւ Հովսեփյանը պայմանավորվել են համատեղ գործունեության մասին՝ երկու երկրներում հարուցված քրգործերի համակողմանի, լիարժեք եւ անկողմնակալ հետաքննության համար», - հայտարարել է Մարկինը:
Ավելի վաղ Բաստրիկինը հայտարարել էր, որ Գյումրիում զանգվածային սպանության գործով հրապարակային դատական գործընթացը տեղի կունենա Հայաստանում: Նա նշել էր, որ Ռուսաստանը լիակատար փոխըմբռնման է հասել Հայաստանի հետ, եւ հստակ պատկերացում կա, թե ինչպիսին պետք է լինի ռուսաստանյան կառույցների օգնությունը ՀՀ իրավապահ մարմինների կողմից իրականացվող քննության ընթացքում:
Ըստ Մարկինի՝ գործի քննությունն իրականացվելու է միջազգային օրենքին եւ երկու երկրների միջեւ ստորագրված փաստաթղթերին համապատասխան
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա: Բժիշկները 7 օր պայքարում էին նրա կյանքի համար, որի ընթացքում նա երկու անգամ վիրահատության ենթարկվեց:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Սպանության փաստով քրգործ է հարուցվել նաեւ ՀՀ Քննչական կոմիտեում:
ՀՀ գլխավոր դատախազության մեկնաբանմամբ, նա գտնվում է ՌԴ իրավազորության ներքո եւ դատվելու է ռուսական օրենսդրությամբ: Այս որոշումը հանրային բողոքի լայն ալիք է բարձրացրել, վերջին օրերին բողոքի ակցիաներ եւ մոմավառություններ են եղել Երեւանում, Գյումրիում, այլ քաղաքներում:
