Գյումրիում դաժանաբար սպանված Ավետիսյանների ընտանիքի անդամների շիրիմներին ծաղկեպսակ դնելու նպատակով այսօր՝ հունվարի 23-ին, Ռուսաստանի Դաշնության մի խումբ պատգամավորներ այցելել են Շիրակի գերեզմանատուն:
Պատգամավորներին ուղեկցում են ԱԺ փոխնախագահ Էդուարդ Շարմազանովը եւ ԱԺ ՀՀԿ խմբակցության ղեկավար Վահրամ Բաղդասարյանը, Գյումրիի քաղաքապետ Սամվել Բալասանյանը:
Հայաստան ժամանած պատվիրակության կազմում են Պետդումայի պատգամավորներ Միխայիլ Կրոտովը, Բորիս Ռեզնիկը, Իգոր Լեբեդեւը, Իրինա Ռոդնինան:
Պատգամավորական խումբը Շիրակի գերեզմանատնից ուղեւորվել է դեպի Գյումրիի «Պատվո բլուր» հուշահամալիր։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը: