Սաուդյան Արաբիայից այժմ ոչինչ կախված չէ. այն այլեւս չի կարող նավթի գների վրա ազդել այնպես, ինչպես այդ կարող էր անել 20 տարի առաջ: Այս մասին NEWS.am-ի թղթակցի հետ զրույցում հայտարարեց Տնտեսագիտության բարձրագույն դպրոցի պրոռեկտոր, ռուսաստանցի հայտնի տնտեսագետ Կոնստանտին Սոնինը:
Այսինքն՝ հիմա, ըստ նրա, բազմաթիվ նավթ արտադրողներ կան: «Սա մրցակցային շուկա է, եւ եթե Սաուդյան Արաբիան կրճատի արդյունահանման ծավալները, նավթի գների վրա դա չի անդրադառնա, պարզապես մյուսներն ավելի շատ կարդյունահանեն»,- նշեց Կոնստանտին Սոնինը:
Եվ երկրորդ, ըստ տնտեսագետը, Սաուդյան Արաբիայի թագավորի մահը չազդեց շուկայի գների վրա, քանի որ այն վաղուց էր սպասվում: «Սաուդյան Արաբիայում մի ամբողջ թագավորական ընտանիք է կառավարում, այդ պատճառով նրանց մոտ քիչ բան է կախված միապետի անձից: Հետեւաբար, նրանց նավթային քաղաքականությունը չի փոխվի»,- ընդգծեց Սոնինը:
Հիշեցնենք, որ սաուդյան վեցերորդ թագավոր Աբդուլլան 91 տարեկանում կյանքից հեռացել է հունվարի 23-ին: 1953 թվականին Աբդել Ազիզ թագավորի՝ Սաուդյան Արաբիայի հիմնադրի մահից հետո, ավելի քան 60 տարի գահը մեկ որդուց անցնում է մյուսին:
Դինաստիայում յոթերորդը՝ Սաուդյան Արաբիայի Սալման բեն Աբդելազիզ աս-Սաուդ թագավորը, ամենայն հավանականությամբ, կհետեւեի իր նախորդի նավթային քաղաքականությանը: Այսպիսով, Սաուդյան Արաբիան, հավանաբար, կշարունակի նախկին ծավալներով նավթ արդյունահանել՝ օրական շուրջ 9.5 մլն բարել, որպեսզի պահպանի շուկայում իր մասնաբաժինը: Թագավորությունից նավթի արտահանումը կազմում է օրական շուրջ 7 մլն՝ ապահովելով համաշխարհային մատակարարումների ավելի քան 10%-ը: