Դոնեցկի մարզի Դեբալցովոյի քաղաքապետ Վլադիմիր Պրոցենկոն, որին 2014 թ. հուլիսից որոնում են Ուկրաինայի իշխանությունները, ձերբակալվել է Սվետլոդարսկում: Նրան մեղադրում են ինքնահռչակված ԴԺՀ-ին աջակցելու մեջ: Այս մասին Facebook-ի իր էջում հայտնել է Ուկրաինայի ՆԳՆախարար Արսեն Ավակովը:
Ըստ նրա՝ ավելի վաղ Պրոցենկոյի կինը հայտարարել էր, որ իր ամուսինը առեւանգվել է անհայտ անձանց կողմից: «Սակայն իրավապահ մարմիններին հայտնի է եղել, որ նա է կազմակերպել ԴԺՀ-ի վերաբերյալ հանրաքվեն, մասնակցել Դեբալցովոյի ժողովրդական դրուժինյի ձեւավորմանը, կազմակեպել անջատականների հենակետերը», — նշել է Ավակովը:
Ուկրաինայի ուժայինների կողմից Դեբալցովոյի աշխարհազորայիններին հետ մղելուց հետո Պրոցենկոն «թաքնվել է՝ կազմակերպելով իր առեւանգումը»: Ըստ Ավակովի՝ հունվարի 22-ին Պրոցենկոն «փորձել է ապակայունացնել քաղաքի պետհաստատությունների աշխատանքը, խուճապ սերմանել ժողովրդի շրջանում՝ հայտարարելով, որ քաղաքը շրջափակված է»: «Մենք երկար չսպասեցինք», — նշել է Ավակովը:
