Ճապոնիայի հատուկ ծառայությունները շարունակում են «Իսլամական պետության» կողմից առեւանգված պատանդների գտնվելու վայրի հայտնաբերման գործողությունները։ Ճապոնիան մյուս երկրների հետ համատեղ գործադրում է բոլոր ջանքերը պատանդների ազատման համար։
«Մենք փորձեցինք պարզել պատանդների գտնվելու վայրը,սակայն ոչ մի նոր տեղեկություն այժմ տրամադրել չենք կարող։ Իրավիճակը խիստ լարված է, եւ մենք շարունակում ենք բոլոր անհրաժեշտ քայլերը ձեռնարկել», - ասել է արտգործնախարար Ֆումիո Կիսիդան, փոխանցում է «Միր 24»-ը;
Հունվարի 23-ին լրանում էր ճապոնացիների համար փրկագնի վճարման վերջնաժամկետը։
Գրոհայինները հայտարարություն էին տարածել, որ կկատարեն խոստումը եւ մահապատժի կենթարկեն պատանդներին։ Ահաբեկիչներին կոչով դիմել է պատանդներից մեկի մայրը՝ խնդրելով խնայել որդուն, որը երբեք էլ «Իսլամական պետության» թշնամին չի եղել։ Միաժամանակ, Ճապոնիայի իշանությունները հրաժարվել են փրկագին վճարելուց։
Հունվարի 20-ին իսլամիստները ցանցում տեսագրություն էին տեղադրել ճապոնացի երկու պատանդների՝ Կենձի Գոտոյի եւ Հարունա Յուկավայի մասնակցությամբ եւ պահանջել 72 ժամվա ընթացքում 200 մլն դոլար փրկագին վճարել, հակառակ դեպքում սպառնում էին սպանել պատանդներին։