Մինվոդիում գոյություն ունեն ընդդիմադիր ուժեր, որոնք ցանկանում են համոզել, որ բողոքի ակցիաները կապված են Գյումրիում հայ ընտանիքի սպանության հետ, բայց դրանք Գյումրիի սպանության հետ կապել չի կարելի: Այս մասին NEWS.am-ի թղթակցի հետ զրույցում հավաստեց Ռուսաստանի հայերի միության Ստավրոպոլի տարածքային մասնաճյուղի ղեկավար Գեորգի Սաֆարովը:
Նրա խոսքով, Մինվոդիում շուրջ 100 մարդու մասնակցությամբ չարտոնված բողոքի ակցիա է անցկացվել: «Դա չի կարելի ցույց անվանել: Մասնակիցների կեսը տեղացիներ չէին, ընդդիմադիր ուժերը նրանց ինչ-որ տեղից բերել էին: Հայերի դեմ ուղղված ոչինչ չկար, հիմնականում խոսում էին իրավապահ մարմինների հասցեին, որ նրանք վատ են աշխատում»,- նշեց Գեորգի Սաֆարովը:
Հիշեցնենք, որ օրերս Մինվոդիի «Օպերա» կարաոկե-բարում վեճ է տեղի ունեցել ընկերական երկու շրջանակի միջեւ: Վիճաբանությանը մասնակցել են տեղի բնակիչներն ու մոտակայքում տեղակայված զորամասի պայմանագրային զինծառայողները:
Զինվորներից մեկը՝ 26-ամյա Դմիտրի Սիդորենկոն, որը ներքին զորքերի «Էդելվեյս» հատուկ նշանակության ջոկատի անդամ է, դանակի հարված է ստացել: Դանակահարության մեջ մեղադրվող Միխայիլ Գրիգորյանը հունվարի 23-ին ձերբակալվել է:
