Նիժնի Նովգորոդի «ՌԲԿ- Ռուբիկոն» շինարարական ընկերության հիմնադիր եւ ղեկավար Եղիազար Եղիազարյանին, որը հունվարի 21-ին սպանվել է Նիժնի Նովգորոդում, կհուղարկավորեն Հայաստանում: Այս մասին գրում է vremyan.ru-ն՝ վկայակոչելով գործարարի շրջապատի աղբյուրին:
Եղիազար Եղիազարյանին սպանված են գտել հունվարի 21-ի ուշ երեկոյան, քաղաքի կենտրոնում գտնվող իր տան բակում: Օպերատիվ տեղեկատվության համաձայն, հանցագործը գործարարի գլխին հարվածել է ծանր բութ գործիքով, երբ վերջինը դուրս է եկել մեքենայից: Քննչական կոմիտեի բժիշկը նշել է, որ մահվան հստակ պատճառը հնարավոր կլինի որոշել դիահերձումից եւ դատաբժշկական փորձաքննությունից հետո միայն:
Հարուցվել է քրեական գործ՝ ՌԴ Քրեական օրենսգրքի 105-րդ հոդվածի հատկանիշներով (կանխամտածված սպանություն): Հետաքննությունը դիտարկում է բոլոր վարկածները՝ պատվիրված սպանությունից մինչեւ պատահական կենցաղային վեճը:
«ՌԲԿ- Ռուբիկոն» ճանապարհաշինական ընկերությունը, որին ասֆալտի խոշոր գործարան է պատկանում, հիմնադրվել է 1991 թվականին: Ընկերությունը բազմաթիվ մրցույթների է մասնակցել՝ կապված քաղաքային ճանապարհների կառուցման եւ վերանորոգման, տարածքի բարեկարգման հետ: 2008 թվականից այն ավելի քան 70 պետական եւ քաղաքային պայմանագիր է ստացել: Եղիազար Եղիազարյանն ընկերության միակ հիմնադիրն էր:
