Տարվա կարեւորագույն իրադարձությունը ՀՀ կողմից Եվրասիական տնտեսական միությանը (ԵԱՏՄ) միանալու գործընթացի հաջող ավարտն էր, ինչը բխում է Հայաստանի ռազմավարական շահերից, նոր հնարավորություններ է բացում երկրի տնտեսական զարգացման համար: Այդ մասին նշվում է ՀՀ ԱԳՆ տարեկան հաշվետվությունում:
2014թ. մայիսի 29-ին Աստանայում ստորագրվեց Եվրասիական տնտեսական միության ստեղծման մասին պայմանագիրը, իսկ հոկտեմբերի 10-ին կառույցի հիմնադիր փաստաթղթին Հայաստանի միանալու մասին պայմանագիրը:
Դեկտեմբերին Հայաստանի, ինչպես նաեւ Բելառուսի, Ղազախստանի եւ Ռուսաստանի խորհրդարանների կողմից վավերացվել է Հայաստանի Հանրապետության՝ Եվրասիական տնտեսական միության մասին 2014թ. մայիսի 29-ին համաձայնագրին միանալու մասին պայմանագիրը:
Տարվա ընթացքում կայացել է Եվրասիական տնտեսական բարձրագույն խորհրդի՝ նախագահների մակարդակով երեք նիստ՝ մայիսի 29-ին Աստանայում, հոկտեմբերի 10-ին Մինսկում եւ դեկտեմբերի 23-ին Մոսկվայում, որոնց մասնակցել է ՀՀ Նախագահը: Կայացել է նաեւ կառավարության ղեկավարների մակարդակով երկու նիստ՝ մայիսի 30-ին Մինսկում եւ նոյեմբերի 21-ին Աշխաբադում, որոնցում եւս ներկայացված է եղել Հայաստանը վարչապետի մակարդակով:
