Տարին նշանավորվել է Ռուսաստանի Դաշնության հետ դաշնակցային ռազմավարական հարաբերությունների առավել սերտացմամբ եւ խորացմամբ: Այդ մասին նշվում է ՀՀ ԱԳՆ տարեկան հաշվետվությունում:
Երկու երկրների բարձրագույն ղեկավարության միջեւ երկկողմ եւ բազմակողմ ձեւաչափերում կայացած շուրջ մեկ տասնյակ հանդիպումների ընթացքում ձեռք են բերվել ռազմավարական նշանակություն ունեցող պայմանավորվածություններ՝ քաղաքական, արտաքին քաղաքական փոխգործակցության, ռազմական, ռազմատեխնիկական, առեւտրատնտեսական, Հայաստանի տնտեսության արդիականացման եւ դիվերսիֆիկացիայի ապահովման, էներգետիկ, ներառյալ՝ միջուկային, տրանսպորտի, հաղորդակցությունների, ենթակառուցվածքների զարգացման, հումանիտար եւ այլ ոլորտներում համագործակցության խորացման ու ընդլայնման վերաբերյալ:
Փետրվարի 7-ին Նախագահ Սերժ Սարգսյանը Սոչիում ներկա է գտնվել Ձմեռային օլիմպիական 22-րդ խաղերի բացման հանդիսավոր արարողությանը:
Մայիսի 8-ին եւ օգոստոսի 9-ին նախագահ Սերժ Սարգսյանը այցելություններ է կատարել Ռուսաստանի Դաշնություն եւ հանդիպումներ ունեցել ՌԴ նախագահ Վլադիմիր Պուտինի հետ: Քննարկվել են ռազմավարական գործընկեր երկու երկրների միջեւ հարաբերությունների առավել ամրապնդման ու խորացման ուղղությամբ հետագա քայլերը:
Հուլիսի 6-7-ը տեղի է ունեցել Ազգային Ժողովի նախագահ Գալուստ Սահակյանի պաշտոնական այցը Մոսկվա, որի շրջանակներում հանդիպումներ են կայացել ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյի եւ Պետական Դումայի նախագահ Սերգեյ Նարիշկինի հետ:
Հուլիսի 11-ին Սոչիում ստորագրվել է համաձայնագիր, որով դյուրացվում է երկու երկների քաղաքացիների միմյանց տարածքներում գտնվելու ընթացակարգը։
Դեկտեմբերի 20-ին ստորագրվել է ՀՀ կառավարության եւ ՌԴ կառավարության միջեւ հայկական ատոմային էլեկտրակայանի 2-րդ էներգաբլոկի շահագործման ժամկետի երկարաձգման հարցում համագործակցության մասին համաձայնագիրը:
Տարվա ընթացքում երկկողմ եւ բազմակողմ ձեւաչափերով Հայաստանի եւ Ռուսաստանի արտգործնախարարները ունեցել են մեկ տասնյակից ավելի հանդիպում: