Հայաստանը 2014թ. ԵԱՀԿ շրջանակներում շարունակել է համագործակցությունը գործող նախագահող երկիր Շվեյցարիայի, ԵԱՀԿ մասնակից երկրների եւ կազմակերպության գործադիր կառույցների հետ՝ ԵԱՀԿ գործունեության երեք հարթություններում։ Այդ մասին նշվում է ՀՀ ԱԳՆ տարեկան հաշվետվությունում
Մարտի 6-ին ԱԳ նախարար Էդվարդ Նալբանդյանը Ժնեւում հանդիպում է ունեցել ԵԱՀԿ գործող նախագահ, Շվեյցարիայի Համադաշնության Նախագահ Դիդիե Բուրկհալտերի հետ: Հունիսի 3-4-ը տեղի է ունեցել ԵԱՀԿ գործող նախագահ, Շվեյցարիայի Համադաշնության Նախագահ Դիդիե Բուրկհալտերի պաշտոնական այցը Հայաստան:
Հայաստանը հանդես է եկել ԵԱՀԿ-ում ԼՂ խաղաղ կարգավորմանն ուղղված Մինսկի խմբի համանախագահների ջանքերին եւ ԼՂ հակամարտության հարցերով գործող նախագահության անձնական ներկայացուցչի գործունեությանն անհրաժեշտ աջակցություն ձեւավորելու դիրքերից: ԵԱՀԿ Մշտական խորհրդում եւ Անվտանգության համագործակցության ֆորումում ՀՀ բարձրաձայնել է եւ գործընկեր երկրների ուշադրությունն է հրավիրել Ադրբեջանի կողմից Արցախի հետ շփման գծում եւ հայ-ադրբեջանական սահմանին հրադադարի կոպտագույն խախտումների, սադրիչ հռետորաբանության եւ գործողությունների վերաբերյալ։
Դեկտեմբերի 4-ին Էդվարդ Նալբանդյանը ելույթով հանդես է եկել ԵԱՀԿ Բազելի նախարարական խորհրդի նիստում, որտեղ կազմակերպության անդամ երկրների ուշադրությունն է հրավիրել առ այն, որ Ադրբեջանի կողմից ռազմատենչ հռետորաբանությունը, հրադադարի ռեժիմի բազմաթիվ կոպտագույն խախտումները, անընդմեջ կրկնվող դիվերսիոն գործողությունները Հայաստանի եւ Ադրբեջանի սահմանին ու Արցախ – Ադրբեջան շփման գծում նոր թափ են ստացել, եւ դրանք Բաքվի ապակառուցողական կեցվածքի, միջնորդների առաջարկությունների շարունակական մերժման հետ միասին թույլ չեն տվել առաջընթաց գրանցել ինչպես հիմնախնդրի կարգավորման հիմնարար սկզբունքների շուրջ համաձայնության հասնելու, այնպես էլ վստահության ամրապնդման վերաբերյալ միջազգային հանրության կոչերն իրականություն դարձնելու գործում։ Նախարար Նալբանդյանն անդրադարձել է նաեւ Հայոց ցեղասպանության միջազգային ճանաչման գործընթացին եւ ԵԱՀԿ օրակարգային խնդիրներին:
Շարունակվել է ԵԱՀԿ երեւանյան գրասենյակի հետ համագործակցությունը, որն իրականացվել է անվտանգության, տնտեսության, բնապահպանության, մարդու իրավունքների եւ արդյունավետ կառավարման ոլորտներում:
