Շիրակի մարզի փաստաբանները պատրաստ են անվճար իրավաբանական օգնություն ցույց տալ Ավետիսյանների ընտանիքի հարազատներին, այդ թվում՝ հանդես գալ որպես ներկայացուցիչ: Այս մասին «Ֆեյսբուքի» իր էջում գրել է փաստաբան Հայկ Հարությունյանը:
«Եթե անհրաժեշտ լինի մենք պատրաստ ենք ամբողջ 30 փաստաբաններով ներգրավել եւ օգնություն ցուցաբերել: Քանի որ մենք չենք ճանաչում Ավետիսյանների ընտանիքի հարազատներին եւ չգիտենք ով է հանդես գալու որպես իրավահաջորդ, շահագրգիռ անձանց խնդրում եմ տեղեկացնել Ավետիսյանների հարազատներին մեր պատրաստակամության մասին եւ հայտնեն մեր տվյալները:
Նշենք, որ Ավետիսյանները մեզ հետ զրույցում հայտնել էին, որ իրավաբանական, հոգեբանական օգնության կարիք ունեն, ինչպես նաեւ ցանկանում են, որ իրենց անվտանգությունը ապահովեն: Ավետիսյանները որոշել են նաեւ, որ գործի շրջանակներում տուժողի իրավահաջորդ կընդգրկվի Արմեն Ավետիսյանի 2 քույրերը, Հասմիկ Ավետիսյանի 3 քույրերը, Արաքսյայի հայրն ու մայրը: Գործի շրջանակներում մահացածները ճանաչվել են տուժող, բայց դեռ տուժողի իրավահաջարոդ ընդգրկված չէ, դրա համար անհրաժեշտ է, որպեսզի նրանք դիմեն քննիչին:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
