Գյումրիում Ավետիսյանների ընտանիքի սպանության գործով քննությունը կտա բոլոր հարցերի պատասխանները: Այդ մասին այսօր՝ հունվարի 27-ին, մամուլի ասուլիսի ժամանակ հայտարարեց պաշտպանության նախարար Սեյրան Օհանյանը:
Հիշեցնելով, որ ռուսական կողմը, այդ թվում՝ պաշտպանության նախարարության ղեկավարության մակարդակով, նույնպես դատապարտել է հանցագործությունը՝ նախարարը ընդգծեց, որ քննչական խմբին լուրջ աշխատանք է սպասվում: «Վերջիվերջո, անհրաժեշտ է բացահայտել՝ հանցագործությունն արդյոք Պերմյակո՞վն է իրագործել, թե՞ նրա հետեւում կանգնած են ինչ-որ ուժեր: Գաղտնի բնույթ կրող շատ հարցեր կան: Ոչ ես, ոչ դուք, իրավունք չունենք միջամտել գործի եւ իրավական ոլորտի մանրամասներին», նկատել է նախարարը՝ ի պատասխան ռուսական կողմի գործողությունների իրավաչափությունը պարզելու փորձերին:
Ռուսական ռազմակայանում կարգապահությանը եւ կադրերի համալրման գործում հայկական կողմի հնարավոր մասնակցության մասին հարցին Սեյրան Օհանյանը պատասխանել է, որ ռազմակայանի ներկա հրամանատար գնդապետ Ռուզինսկին մեծ աշխատանք է կատարել կարգապահության բարձրացման ուղղությամբ: «Ես կարող եմ իրավիճակը համեմատել նախկինում եղածի հետ եւ միանշանակ պնդում եմ, որ կարգապահության մակարդակը բարձրացել է: Միաժամանակ մեծ աշխատանք։ է կատարվել ժամանակակից սպառազինություններով համալրման առումով»,-ասել է նախարարը:
Ինչ վերաբերում է կադրերի ընտրության հարցում Հայաստանի մասնակցությանը, Սեյրան Օհանյանը հիշեցրել է, որ յուրաքանչյուր ինքնիշխան պետություն ինքն է որոշում իր անվտանգության խնդիրները: «Ճիշտ չի լինի, որ մենք խառնվենք կադրերի հարցում»,-նկատել է նախարարը:
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
