Լոռու մարզի ընդհանուր իրավասության դատարանի դատավոր Խաչատուր Խաչատրյանին կալանավորելու հարցով Վերաքննիչ դատարանում նիստ է նշանակվել հունվարի 29-ին: Այս մասին NEWS.am-ի թղթակցի հետ զրույցում ասաց նրա փաստաբանը՝ Կարեն Թումանյանը:
Ծանրաբեռնվածության պատճառով իրենք չեն կարողանալու ներկայանալ եւ միջնորդել են նիստը այլ օր նշանակել: Փաստաբանը նշեց նաեւ, որ Արդարադատության խորհրդից ստացել են ավելի վաղ հայցած փաստաթղթերը՝ դատավորին մեղադրանք ներկայացնելու վերաբերյալ , ինչպես նաեւ նիստերի արձանագրությունները: Ի դեպ, Խաչատուր Խաչատրյանը մինչեւ օրս ցուցմունք չի տվել, որեւէ փորձաքննության եզրակացություն դեռ չկա: Կարեն Թումանյանն ասաց, որ նրա լիազորությունները դեռ դադարեցված չեն, քանի դեռ չկա օրինական ուժի մեջ մտած դատավճիռ, նա համարվում է դատավոր եւ ստանում է աշխատավարձ:
Հիշեցնենք, որ դեկտեմբերի 25-ին ՀՀ Ազգային անվտանգության ծառայության իրականացրած օպերատիվ-հետախուզական միջոցառումների արդյունքում կաշառք ստանալու պահին ձերբակալվել է ՀՀ Լոռու մարզի ընդհանուր իրավասության դատարանի դատավոր Խ. Խաչատրյանը: ՀՀ ԱԱԾ քննչական վարչությունում հարուցվել է քրեական գործ ՀՀ Քր.օրի 311 հոդվածի 4-րդ մասի 2-րդ և 3-րդ կետի հատկանիշներով: Կատարվում է նախաքննություն: ՀՀ գլխավոր դատախազ Գ. Կոստանյանը ՀՀ դատական օրենսգրքի 168-րդ հոդվածով նախատեսված կարգով ՀՀ Լոռու մարզի ընդհանուր իրավասության դատարանի դատավոր Խ. Խաչատրյանին որպես մեղադրյալ ներգրավելու վերաբերյալ միջնորդություն է ներկայացրել Արդարադատության խորհուրդ, որը բավարարվել է: Դատավորը կալանավորված է:
