ՀՀ քննչական կոմիտեն Գյումրիում կատարված ողբերգության բազմաթիվ վարկածներ է քննարկում։ Այս մասին այսօր՝ հունվարի 28-ին, լրագրողներին ասաց ՀՀ ոստիկանապետ Վլադիմիր Գասպարյանը՝ խորհուրդ տալով ենթադրություններ չանել, սպասել նախաքննության ավարտին եւ բամբասանքներ չտարածել, որպեսզի ոստիկանությունը «իր էներգիան չսպառի դրանց վրա»։
«Երկու օր առաջ էլ լուրեր տարածեցին, թե ռուսական ռազմաբազայից վեց զինված զինվոր է փախել։ Չի կարելի անել այդպիսի բան եւ չի կարելի հանդուրժել այդպիսի բան։ Դա եւ գործի վրա է ազդում եւ մարդկանց հոգեբանության վրա»,- ասաց ոստիկանապետը։
Իրավապահ մարմինների ոչ հրապարակային աշխատանքի վերաբերյալ դիտարկմանը Վլադիմիր Գասպարյանը պատասխանեց. «Իսկ ո՞վ ա ասում, որ քննությունը ձեզ 15 րոպեն մեկ պիտի հաշվետու լինի»։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
