Ադրբեջանը սահմանին լարվածություն ստեղծելով փորձում է առաջին հերթին ազդել միջազգային կառույցների վրա, որպեսզի Հայաստանն ավելի մեծ զիջումների գնա Լեռնային Ղարաբաղի հակամարտության կարգավորման գործում: Այս մասին այսօր՝ հունվարի 28-ին, լրագրողների հետ զրույցում ասաց ՀՀ պաշտպանության նախարար Սեյրան Օհանյանը:
«Մեր հարեւանները չեն հասկանում, որ երկխոսությունն է այն միակ ձեւը, որը կարող է բերել խաղաղ, քաղաքական պայմաններով հարցի լուծման։ Փոխադարձ համաձայնությունը, վստահության մթնոլորտի ստեղծումն է, որը հնարավորություն կտա նաեւ խոսել, բանակցել եւ տեսնել, թե ինչպես կարելի է լուծել: Իսկ վստահության մթնոլորտի ստեղծումը հիմնականում կախված է մեզնից, որն իրականացվում է հիմնականում առաջին գծում՝ այսինքն ստեղծել խաղաղ պայմաններ, հրադադարի պայմանների կատարում, դիպուկահարներին հետ քաշելը, դիվերսիոն գործողություններից զերծ մնալը։ Ցավոք սրտի, այդ ամենից մեր հարեւանները հրաժարվում են՝ փորձելով այսպես ազդել հայկական կողմի վրա»,-ասաց նախարարը։
Սահմանային լարվածությունը Ադրբեջանի կողմից մեծացնելը, ըստ նախարարի, լուծում է նաեւ ներքաղաքական խնդիրներ, որոնց նպատակն է շեղել ուշադրությունը իր տնտեսության, մարդու իրավունքների, խոսքի ազատության, ազգային փոքրամասնությունների հետ կապված խնդիրներից՝ դեպի առաջին գիծ:
«Լարվածությունը մերթընդմերթ ավելի է սաստկանում, բայց հայկական զինված ուժերը, եւ ԼՂՀ պաշտպանության բանակը լիարժեք վերահսկում են իրադրությունը եւ արժանի հակահարված տալիս բոլոր ոտնձգություններին: Մենք ըստ անհարաժեշտության կանխարգելիչ, պատժիչ գործողություններ ենք իրականացնում, որովհետեւ այդ լեզուն է միայն թշնամին հասկանում»,- ասաց Սեյրան Օհանյանը՝ նշելով, որ այս օրերին իրավիճակը սահմանում վերահսկելի է, թեւ կրակոցները շատացնել են։
