Թուրքիայի վարչապետի հայ խորհրդական Էթյեն Մահչուփյանը հայտարարել է, թե Հայաստանի իշխանություններն ու հասարակությունը Հայկական սփյուռքից ավելի պատրաստ են Թուրքիայի հետ հարաբերություններին։
Թուրքական Anadolu գործակալության փոխանցմամբ՝ Հյուսիսային Իրաքի Քուրդիստանի ինքանավար հատվածում այցով գտնվող Թուրքիայի վարչապետի գլխավոր խորհրդական Էթյեն Մահչուփյանը հարցազրույցի ժամանակ հայտնել է, թե 1915-ի 100-րդ տարելիցի հետ կապված երկկողմ քայլեր իրականացվելու դեպքում հայ-թուրքական հարաբերությունների ուղղությունը կփոխվի, քանի որ Հայաստանի իշխանություններն ու հասարակությունը Հայկական սփյուռքից ավելի պատրաստ են հարաբերությունների կարգավորմանը։
«Երկու հասարակությունների միջեւ «կարոտ» կա։ Այդ հասարակությունները նույն մշակույթի զավակներն են, լսում են նույն երաժշտությունը, կարդում են նույն բաները։ Այսինքն, երկու հասարակությունների միջեւ նման «կարոտ» կա եւ երկու կողմն էլ պատրաստ են սկսել շփումներ։ Սակայն մենք մի աշխարհում ենք, որը ազգային է, կան սահմաններ եւ պետություններ։ Դա գործը մի քիչ ֆորմալ վիճակի է բերում։ Դա էլ նպաստում է հարաբերությունների փոքր ինչ սառեցմանը»,-ասել է Մահչուփյանը։
Մահչուփյանը հիշեցրել է, որ վարչապետ Ահմեդ Դավութօղլուն Հրանտ Դինքի հետ կապված ուղերձով էր հանդես եկել։ Դա շատ կարեւոր է։ Այդքան տարիներ անց Հրանտին թե հայ ինքնությանը, թե Թուրքիային տեր կանգնած անատոլիացի է ճանաչում վարչապետը։ Իհարկե, այս տարին 1915-ի 100-րդ տարելիցն է։ Այդ իսկ պատճառով ամբողջ տարին կարեւոր է։ Կարծում եմ՝ ամբողջ տարին կլինեն շատ միջոցառումներ, որտեղ Թուրքիան ցույց կտա, որ ինչ որ բան է ուզում անել եւ ձեռք է մեկնում։ Սակայն դրանք հստակեցնելու համար որոշման ինչ-որ մեխանիզմ է հարկավոր»-հավելել է Թուրքիայի վարչապետի գլխավոր խորհրդականը։
